大年初二，又到睇煙花的日子，今年煙花「銀幕」高300米、闊700米，主辦單位估計將會有40萬人夾岸賞煙花，大家真係要金睛火眼兼做足事前頸部運動，搵定好位。你一定會問：「豬年煙花有何好睇？」可愛粉紅豬鼻、吉字和金元寶煙花夠精采未？準晚上8:00就開始，食完下午茶，執好影相和零食裝備，下午6:00就要霸定位啦！
吉字煙花 只放兩分鐘
耗資400萬的賀年煙花長達23分鐘，由3艘躉船在會展對開300米成一直線排開，發放23,888枚直徑4至7吋的煙花彈，煙花年年放，但今年的特色是在煙花技術上有新突破，除了12幕設計新穎的煙花，在「恭喜發財」一幕中仲出現一個個中國字「吉」字字樣，代表大吉大利。
第1幕 恭喜發財
配樂：恭喜發財–劉德華
因天空較少煙花產生的煙霧，所以吉字煙花會首幕發放，令吉字清楚啲，維港兩岸的市民都可以睇到，自然大吉大利！2分鐘內連續發放的吉字煙花，每個直徑100米，約維持3至4秒，在變色菊花的映襯下，寓意「大吉大利」，將本來立體的煙花變成平面，因為吉字線條有直有曲，製作難度十分高。
第3幕 財神到
配樂：財神到－Twins
過年最重要是有金有銀，今次首度出現金元寶煙花的圖案，將會灑向兩岸的市民，海面還有8字形的「金色拉手」和「紅色拉手」煙花，寓意百事順景。
第4幕 豬籠入水
配樂：仲有最靚的豬腩肉–麥兜
豬年點少得豬豬呢？豬籠入水嘛！豬煙花係由大圈煙花包圍兩個小煙花，形成粉紅豬鼻，好可愛，更有人見人愛的彩色笑臉；發放時還有小朋友琅琅上口的兒歌「仲有最靚的豬腩肉」做配樂，這一幕應該是最𠱁得大人細路歡心。
其他
第2幕歡樂年年
配樂：歡樂年年–Twins
炮仗聲會隨煙花辟辟啪啪作響，如大爆裂的瀑布一湧而下。
第5幕百業興旺
配樂：ZoostersBreakout–HansZimmer
一句講晒，大堆頭兼百花齊放。
第6幕 月映長空
配樂：ReflectionsofPassion–Yanni
呢幕用上特大閃光的紅、粉紅、草綠、橙和藍色煙花劃破長空，如天使秀髮。
第7幕 夢幻之旅
配樂：KeystoImagination–Yanni
大玩層次煙花，高空會出現各式爆炸效果，而低空有一排綠色的煙花，高低交錯。
第8幕 萬物叢生
配樂：CelticKittens–
MichaelFlatley
紅、金、綠、銀的子母彈會不停發放，成為七彩斑斕的煙花。
第9幕 香格里拉
配樂：Shangri-La–
女子十二樂坊
幸福水晶球形狀的環狀煙花，就如大家心目中的理想世界。
第10幕 一家團聚
配樂：摩登大唐–王曉南
煙花會四處走，而綠色和紫色的火光會如雨花般灑在海面上空。
第11幕 笑逐顏開
配樂：CroationRhapsody–AlonsoMania
菊花狀的煙花配合水面彩色的燭光煙花，令金光灑滿維港。
第12幕 粵港大團圓
配樂：Kolibre–Maksim
尾場「粵港大團圓」是全場煙花滙演的高峯，七彩煙花，密集式發放，再配以排山倒海禮炮，主辦單位大賣關子，不肯透露詳情。
慳錢睇煙花靚位
坐擁靚景位的餐廳今日應該爆滿，介紹你去都無用，要睇粉紅豬鼻和空中大吉煙花，又唔想花太多錢，就要早一點霸定頭位。最佳位置一定係尖東海旁和金紫荊廣場，大會在那裏裝設喇叭播放音樂，到其他地方就要收聽港台第四台的直播，但人山人海，想起要迫都驚，就算要迫都唔想咁誇張，以下推介的地點應該可以幫到你，不過，都係要早少少霸位㗎！
金紫荊廣場
金紫荊廣場是煙花配樂的地點，可以清楚睇到煙花有幾大朵，周邊配套設施齊全，有新翼做背景，攝影發燒友影完煙花可以影番張靚相；因該區會有封路措施，如駕車前往宜預早用會展的有蓋停車場。
IFC
IFC對出的行人天橋夠開揚，雖然唔係好正，但不用和人迫，IFC內的Canteen可以讓你食住快餐睇煙花，不過，最好早啲去霸位。
銅鑼灣世貿中心麥記
唔使訂位，Walk-in最貴個餐都只是廿幾蚊，當然，坐窗口位就一定要霸位囉！
寶馬山慧翠道汽車迴旋處（樹仁學院旁）
比尖東和灣仔少人，又可俯覽維港醉人夜色和璀璨煙花，睇完搭巴士就走得。
添馬艦至中信大廈
雖然無會展對正煙花咁好，但位置空曠，加上有個大空地，都唔錯。
尖東海旁 星光大道
尖東海旁對岸是港島區大廈，煙花加燈飾，當然是最靚最震撼。
山頂
如果你打算用單鏡機和200mm的鏡頭影煙花相，山頂係你的理想地點，構圖都相當唔錯。
影煙花攻略
今年煙花咁特別，係咪好想影低呢？很多發燒友都會攞齊器材，但其實無論你用單鏡反光機，或用卡片機一樣可以影到煙花，當然經驗好重要，等本刊的攝影師教你影煙花的技巧啦！
單鏡反光機用黑卡
攝影師Alex說影煙花在尖沙嘴海旁或金紫荊廣場最好，而下午4時就要去霸位。不過，無論你用邊部相機，切記要充足電，而且腳架至少可穩定機身，不會震動；最好選用速度快的記憶卡，以免阻礙時間。
別以為影煙花要用高ISO，其實煙花的光度很高，加上背景的大廈燈飾，用ISO100甚至ISO50就可以，避免相片黑位出現雜訊。光圈一般會用F5.6至F11，F2.8光圈會太大，會令煙花線條化開。
你可能想一張煙花相有4至5個煙花，但實際情況每次只有2個至3個煙花；此時，可以利用一張黑卡，長開快門，影2個煙花後，以黑卡遮掩鏡頭，待煙霧散開，再有其他煙花發放時，拿起黑卡，讓煙花影像進入鏡頭，這樣就可影到多個煙花的相片。
卡片DC機要校煙花模式
如果你用卡片DC機，首先關掉閃燈，同樣選擇ISO100，將拍攝模式調校至夜景模式或煙花模式，如果機身有Manual，可自行設定快門和光圈，如有B掣快門的Function就更好。
小朋友注意
頸部運動
煙花滙演歷時23分鐘，試想想連續抬頭近半小時，小朋友好易會頸梗膊痛，好易弄傷頸部，所以看煙花前後都應做一些舒展筋骨的動作，每個動作要重複做10次，不要偷懶呀！
零食遊戲機唔少得
年初二的氣溫19-22℃，有幾陣雨，小朋友跟大人去睇煙花就要帶雨具。無論你去邊度睇煙花都要預早霸位，小朋友坐唔定，帶備手提遊戲機或漫畫書就最好，唔怕悶親佢；仲要帶定餅亁、零食和水，就唔怕佢肚餓口渴。現時正值流感高峯期，公眾地方人多細菌自然多，有必要戴上口罩，免遭傳染。
丁亥年新春煙花滙演
日期：2月19日（年初二）
時間：晚上8:00
地點：維港兩岸