初二開年，大家都要開開竅，八方就同讀者玩吓PhotoHunt遊戲，呢處有幾幅《蘋果日報》最近3年大年初一嘅頭版相，都係善信喺黃大仙上香嘅盛況，請問當中有乜共同之處呢？
燈燈燈櫈，答案係三張相都有同一位阿叔上鏡！佢年約50歲、身穿輕便衣物，而且唔怕鼎盛香火，手揸三碌粗過棒球棍嘅香，一馬當先攝埋香爐前，紮好個馬手起香落裝頭炷香。由於佢支香夠粗又夠搶眼，年年都出到位，已經三連霸上《蘋果》大年初一頭版，真係乜彩都攞盡。
呢位阿叔年年都校啱時辰入廟拜神，真係神心兼有恆心，八方見佢氣定神閒，唔似夏蕙姨咁迫到裙拉褲甩，假髮都跌埋，真係好想請教佢有乜秘技。阿叔想向黃大仙求乜呢？大仙係咪有求必應呢？可惜佢裝完香，竄聲就消失喺善信人海之中，叫都叫唔住。
