講完五行，麥玲玲再醒大家各生肖運程，睇吓點樣可以從飲食方面趨吉避凶。
鼠
今年桃花旺盛，飲食應酬會多咗，但受「晦氣」星影響，容易因溝通不足而引起爭拗，所以凡事應保持心平氣和，宜多飲涼茶下火。
牛
去年腸胃較差，豬年會好轉，但由於今年乃是非之年，應避免經常一大班人去食飯，三五知己人少少食就比較適合。
虎 龍 狗
整體運不俗的一年，多啲出席喜慶飲宴場合，更可有助增強自己運勢。
兔
事業運佳，壓力增大，宜多食含維生素C較多的食物如奇異果、菠菜等有助減壓；此外，今年受「五鬼」星影響，有機會產生幻覺，尤其在農曆3、7月，應盡量避免到偏僻地方用膳。
蛇 猴
輕微犯太歲的一年，要特別小心腸胃，食嘢要適可而止，少食油膩食物，多吃生果蔬菜。
馬
貴人運強，會有較多出外應酬大魚大肉的機會，平時就食番清淡啲嚟平衡喇！
羊
今年受「華蓋」星的影響，生活比較孤單，不妨食多啲甜嘢令自己心情開朗。
雞
有「天狗」星的出現，在外地食嘢較易水土不服，要加倍小心。
豬
今年「本命年」犯太歲，有多顆代表受傷的凶星，身體容易出現碰撞和損傷，應戒食豬紅、雞紅等食物。
遠遊東北方小心飲食
豬年乃水旺之年，麥玲玲師傅謂飲食、酒店、運輸等行業發展都唔錯；不過根據今年「九宮飛星」二黑病符星入中宮，即代表全球健康運較差，要慎防農作物失收及食物中毒之問題，尤其以東北方最為嚴重，所以如果打算去日本或韓國旅行的朋友就要特別小心飲食喇！此外，由於有毒食物越來越多，師傅預測今年有機的健康食品會成為大熱，仲話多點食齋菜都唔錯㗎！