「我會做好呢份工」呢句競選口號，唔知邊位軍師諗出嚟嘅，《信報》余錦賢已代《信報》董事何國輝強烈否認係何生嘅意思。曾先生競選辦公室之中，公關高手甚多，有邊位諗出呢句名句呀？
話「我會做好呢份工」成為香江名句，並不過份。雖然有人彈呢句嘅知識層次低，但搞政治口號，要真正學足《壹週刊》創刊精神：「不扮高深，只求傳真」，學何鴻燊話齋，橋不論新舊，最緊要受，「我會做好呢份工」似乎好受民眾受落噃！正是不論黑貓白貓，能贏民望的就是好貓，港大民意調查顯示，如果有普選，煲呔得票七成三，大狀得票一成八，煲呔遙遙領先，故此煲呔嘅競選口號一定係好貓，度出呢句口號嘅仁兄或仁姐，係煲呔眼中之超級可愛貓，唔到其他人唔服。
據講新城財經台有一位仁兄，首先喺佢嘅博客誌之中加多幾句「我會……」點知引來熱烈反應，網友紛紛創作新句子，連到好正經嘅飛機陳都注意到，向左丁山猛咁講。後來股壇名嘴青姐索性下載一頁紙嘅「我會……」畀左丁山睇，內有幽默之言，亦有夾硬嚟之作，好笑啲嘅有：地盤工人：我會鑽好呢個窿；祈福黨：我會博好呢個懵；女明星：我會隆好呢個胸；一樓鳳：我會做好呢隻鳳；長毛：我會競選新界東；大學生：我會攞多啲grantloan；地鐵：我會搞好八達通……，一路加落去，會有幾百句「我會……」都似，大家如有靈感，不妨上網填補空洞，聽高球發燒友講，馬時亨局長呢排興講：「我會打好呢個洞」。
崔少明兄話明「我會寫好呢個欄」，嚇到左丁山連忙許願：「我會寫好左丁山！」至於如何「我會……」，慢慢再諗啦，一於應承住先，𠱁咗老闆開心先。至於誰是老闆，起碼有兩個啦，一個係我嘅選民──即係廣大讀者，另一個係肥佬黎。邊個老闆更重要呀？騎騎，你哋不如問咗煲呔先，唔好問左丁山；左丁山寫稿當打份工，搵食啫，各位大佬，畀條路行吓，彼此彼此，搵食之嘛！啲讀書人講高層次，高境界，因住曲高和寡呀！陽春白雪識者稀，下里巴人多受落，從政者揀邊樣？