古天樂和楊千嬅在華星年代已經認識，他倆都是「大細路」，希望在新年期間抽空到灣仔環球嘉年華遊玩，記者為了幫他們實現願望，特別安排他們在遊樂場拍攝賀年照片。
Fans讚好襯
拍攝期間，人群擠擁，有市民發現兩位紅星就在自己身邊時，更興奮得尖叫起來，也有些女影迷以為古仔和千嬅是秘密情人，偷偷來拍拖談情。不過現場所見，古仔和千嬅確實相當合拍，應攝影師要求攬攬抱抱時，有圍觀者即大讚他們很合襯，千嬅說：「我識古仔好耐啦！大家係好朋友，間中都會約埋食吓飯。」
問千嬅今年有沒有買桃花？她笑說：「早兩日拍戲行開花舖就買咗一棵，希望好運到啦！不過拍拖都係隨緣，要搵到對象先得。但新年願望，我都想有一個好嘅桃花運，可以俾一個鍾意嘅人錫自己。」
古仔則透露今年會留在香港陪伴父母，他說：「平時自己咁忙，冇乜時間陪屋企人，咁新年有幾日假，咪留喺香港陪吓兩老囉！每年嘅年初一下晝，成班親戚會嚟我屋企拜年，因為啲細路爭住想入我間公仔房影相，我點可以唔睇實佢哋？」
盼有代表作
問古仔有甚麼新年願望？他笑說：「最好係事業愛情兩得意啦！拍番部代表作就最開心，今年我都係以拍戲為主，上年雖然拍戲比較忙，但係拍得幾開心，因為可以嘗試好多唔同戲種，對自己演技都係一個考驗。」
採訪：陳月媚 攝影：葉君海
