今日大年初二,難得請到行得天橋入得廚房的陳嘉容(Eunis),同埋近排曝光率爆晒燈的麥玲玲師傅一齊食開年飯。一個係名模,一個係著名堪輿大師,咪以為二人風馬牛不相及喎,麥師傳話同Eunis的生肖特別有緣又夾得來,由五行生肖生仔講到買餸煮飯蒸蘿蔔糕,滔滔不絕;而玲玲師傅仲教埋大家飲食增運法,睇完之後,記得今晚食開年飯時,揀啲有利自己嘅食物,咁就越食越旺啦!
記者:趙珮倩 攝影:陳盛臣
示範:逸東酒店逸東軒(電話:27101093)總廚譚棟
麥玲玲一見到Eunis就大讚佢喺《美女廚房》示範嘅煲仔飯了得,講起廚藝,兩個大忙人,原來都有共同嗜好──鍾意行街市。麥玲玲:「我老公連節瓜同青瓜都唔識分,唐生菜又以為同西生菜一樣,所以唔可以靠佢買餸,不過有時街市檔口啲人見到我去買就會畀啲貴嘢我!」Eunis:「咁我好彩啲喎,通常啲人都會平畀我或者有嘢送㖭!」
講番Eunis今年嘅運程,麥玲玲話屬虎嘅佢今年有「歲合」星,事業運唔錯,「佢今年有機會出現新嘅合作機會,例如可能會拍戲;亦都有好大機會有喜事,如果今年生番個豬仔或者女,個BB會同父母好夾,如果唔係,等多三年到佢本命年生都會夾。」Eunis:「即係要四月之前有咗?嘩!生唔切喎,生豬尾就趕得切!都係順其自然啦!」
五行味道增運
食嘢都可以增運?冇錯!麥師傅話五行中的金、木、水、火、土,分別代表五味中的苦、酸、鹹、辣、甜;所以,按自己出生的農曆月份,找出自己的五行屬性,再根據五行中的平衡之道,多吃對自己命格有利的食物,好運自然來。
金命多吃木火食物
以Eunis為例,秋天出生的她命格金旺,所以要以木性或火性作平衡,即多吃酸或辣的食物,就有助運程;由於她本身命格帶金,故此應盡量減少吸取金性,即忌吃苦味食物。
至於麥師傅自己,由於係冬天出生,則自言最鍾意辣嘢同埋打邊爐,十分有利五行水旺的她,咁識食,唔怪得佢咁旺啦!右表就列出各種命格的食物宜忌,大家自行對號入座喇。
開年飯8道菜
既然教得大家計五行命格嚟食啱嘅嘢,當然要提供一啲參考食譜,等大家煮番餐完美開年飯,一家人開開心心咁迎接豬年啦!
齋
1.野菌蘭度黃金盅
需時:20分鐘 價錢:$25/4人
材料:芥蘭莖8両、珍珠菇3両、鮮冬菇3隻、日本南瓜1個、糖1/2茶匙、鹽少許
做法:先將南瓜挖空心備用;芥蘭莖/珍珠菇/鮮冬菇汆水瀝亁後,下鹽/糖炒熟,放入南瓜中,一起蒸大約5分鐘即可。
甜
2.南田慶豐收
需時:1小時30分鐘 價錢:$20/24件
a.青蘋果酥
材料:麵粉3両、鷹粟粉1茶匙、吉士粉2茶匙、奶粉1茶匙、糖2茶匙、煉奶2湯匙、蛋3隻、百力滋1條、食用色素/豬油少許
做法:麵粉/豬油/食用色素拌勻搓成皮;蛋拂勻,加入1茶匙麵粉、奶粉/鷹粟粉/吉士粉/煉奶/糖和半杯水,攪勻成餡,包上麵粉皮,揑成青蘋果形,頂部插上一小節百力滋,放入焗爐以60℃火焗5分鐘。
b.南瓜酥
材料:糖冬瓜茸4両、鹹蛋黃1隻切碎、白芝麻1茶匙、麵粉3両、南瓜茸3両、豬油1茶匙
做法:燒熱鑊,以慢火炒香糖冬瓜茸/鹹蛋黃/白芝麻成餡料備用;麵粉/南瓜茸/豬油混入1茶匙水搓成皮,包入餡料,揑成南瓜狀,放焗爐以100℃火焗4分鐘。
c.雪梨酥
材料:蓮蓉2両、麵粉4両、吉士粉1両、蛋1隻、糖霜1茶匙、牛油1茶匙
做法:麵粉/吉士粉/蛋/糖霜/牛油攪勻搓成皮,包入蓮蓉,揑成雪梨狀,放焗爐以60℃火焗20分鐘。
d.粟米酥
材料:麵粉1湯匙、牛油/豬油/吉士粉/糖各1茶匙、蓮蓉2両
做法:將麵粉/牛油/豬油/吉士粉/糖拌勻,搓成皮,包入蓮蓉,揑成粟米形,放焗爐以60℃火焗20分鐘。
酸
3.鴻運當頭
需時:10分鐘 價錢:$12/4人
材料:番茄3個、鯪魚肉6両、鹽/糖各1/2茶匙、胡椒粉1/3茶匙、雞湯250毫升、生粉少許、西蘭花1棵
做法:番茄切開去皮去籽備用;鯪魚肉以鹽/糖/胡椒粉調味,番茄撲上少許生粉,釀入鯪魚肉;燒熱鑊,煎香魚肉表面,灒雞湯煮至收亁水即成。西蘭花以鹽/水灼熟,置碟中作裝飾。
辣
4.川辣爆蝦球
需時:25分鐘 價錢:$95/4人
材料:海蝦8両、蛋白1隻、辣椒1/2條(切絲)、豆瓣醬2茶匙、蒜茸1茶匙、鹽/生粉各少許
做法:海蝦去殼挑腸洗淨,以鹽/蛋白/生粉醃15分鐘,走油備用;爆香蒜茸/辣椒絲/豆瓣醬,加入海蝦兜勻即成。
冷盤
橫財鮑汁豬肘
需時:1小時10分鐘(不計浸醃時間)
價錢:$45/4人
材料:豬手1隻、鮑魚汁500毫升
做法:豬手洗淨後,加水以文火煲大約1小時,隨即過冷河,待豬手完全冷卻後,放入鮑魚汁浸至少12小時,然後蒸熱斬件,再放入雪櫃冷凍10分鐘即可享用。
苦
冰鎮涼瓜片
需時:5分鐘 價錢:$5/2人
材料:苦瓜1個、雞粉少許、糖1/2茶匙、魚露1茶匙
做法:將苦瓜切片去籽,然後汆水,隨即用冰水浸一會,瀝亁後混入雞粉/糖/魚露拌勻調味即成。
鹹
馬友生財
需時:5分鐘 價錢:$30/4人
材料:唐生菜12両、馬友鹹魚2両、薑粒少許
做法:唐生菜洗淨瀝亁;馬友去骨切粒備用;以少許油爆香薑粒/馬友,加入唐生菜炒勻即成。
燒
鮮沙薑陳皮生煎雞
需時:30分鐘 價錢:$70/4人
材料:雞1/2隻、陳皮1/2塊、鮮沙薑1粒(切碎)、蒜片/芫荽/葱/紅椒絲各適量
醃料:雞粉1/3茶匙、糖1/2茶匙、豉油1茶匙、生粉少許
做法:先將雞去骨,以醃料醃15分鐘;陳皮浸腍後切絲;以少許油爆香蒜片/沙薑/陳皮,下雞炒至8成熟,加入芫荽/葱/椒絲兜勻,放上已燒熱的鐵板待雞全熟即可。