恭喜發財！農曆新年期間，除了拜年或外遊，有否想過留港玩餐飽？留港當然亦可玩餐飽，香港有個海洋公園嘛！海洋公園啱啱就推出咗一個新景點「七彩昇空天地」，讓大家坐上巨型氣球，步步高陞120米!而廸士尼呢，都請咗著名嘅三隻小豬撐場，跟大家一齊賀豬年！
記者：錢靖雯
攝影：陳陶鈞、楊錦文
七彩昇空天地
全港首個升空巨型氦氣球
（永久景點，於農曆新年期間推出）
「七彩昇空天地」係海洋公園農曆新年期間推出的最新景點，這裏有全港首個升空巨型氦氣球，氣球直徑22米，每次可容納最多29人和1個控制員，飛上120米，約40層樓咁高！上到120米上空可以睇到乜？當然係全個海洋公園景色啦！「七彩昇空天地」內，還有裝扮得意的「升球人」表演雜耍特技，絕對係好玩兼影相好去處。
到財神殿見財神
坐完氣球升空刺激完，係時候實際啲去見財神啦!見財神要去「財神殿」，裏面的「聚寶室」運財童子會派筷子畀你在充氣的聚寶箱中夾揮春，今年發財定升職？就睇你夾到邊個揮春了。
其他新春節目
新春期間，海洋公園還有「行運金豬送大禮」、「金裝賀歲表演」舞龍舞獅，以及壓軸的「鼓舞飛揚」等賀歲節目，此外，公園內還有個桃花陣，情侶們快啲去繞個圈啦!
還有還有，適逢海洋公園30大壽，特別推出了一連串節目，好似「兒童樂園×闔府同樂」就有「經典玩具玩樂屋」、「廚藝合家歡」呢啲啱晒大人細路一齊玩的節目。坐完氣球見過財神，有時間當然要順便玩埋呢Part啦!
新春節目舉行日期：2月18日至3月4日
開放時間：上午10時至晚上7時（2月18日至25日延長至晚上8時）
入場費：成人$185、小童（3-11歲）$93
（日場門票費用已包括所有海洋公園大團拜活動）
查詢：25520291或www.oceanpark.com.hk
注意：如果天氣惡劣，升空氣球會暫停開放，但「七彩昇空天地」則仍會如常運作。