香港係國際大都會，各色人種都有，華洋雜處，本來一直相安無事，比起部分外國地區，種族歧視一向唔算好嚴重。不過話時話，𠵱家政府搞緊條禁止種族歧視條例草案，一個唔小心，例如喊咗聲阿差，就分分鐘犯咗法都唔知。好似沙皇李國章領軍嘅教統局，竟然有高官直呼「差仔」呢啲咁唔尊重人哋嘅說話，真係失晒禮。
「有問題唔該返鄉下」
踢爆事件嘅係融樂會總幹事王惠芬，佢話香港每年約有8,000名小數族裔學童，由於中文欠佳，升讀預科課程一向出現困難，每年約有400名會考生未能升讀中六，苦無出路，但教育統籌局官員從無正視呢個問題。佢話，有教統局高官同佢討論有關問題時，竟然直呼學童為「差仔」，仲叫佢地「有問題就唔該返鄉下」。聽見咁講，王惠芬唔知會唔會當堂打個突？
至於個高官係邊個，八方不妨賣個關子。之不過唔等如李國章可以袖手旁觀，因為𠵱家喺佢個部門有人出言不遜，有侮辱他人之嫌，仲分分鐘惹上官非，身為官員如果因為咁樣上法庭，都咪話唔丟架。
其實政府搞條種族歧視條例都唔知有乜迫切性，因為香港地種族歧視事實上唔算嚴重，你幾時見中國人睇少老外？頂多係睇小啲少數族群，但佢哋人數畢竟唔算多，所以如果要搞不如就搞禁止歧視新移民或者窮人仲實際，𠵱家直情係阿茂整餅，搵嚟搞。