第一次買股票會抱住小心謹慎嘅投資心態，抑或搵快錢嘅投機心態呢？喺《香港討論區》，網友disgust.com.hk話：「第一次買股，梗係要夠安全、夠穩陣，諗住買咗之後，短期都唔會沽出，當然就會買滙豐（005）啦。」唔少網友都深表贊同，認為初嘗投資嘅滋味，都係穩賺至上，所以通常會買本地或者中資銀行股，好似工行（1398）、交行（3328）同招行（3968），對佢哋充滿信心。網友due_hing好開心咁話：「我之前喺3.3元買入交行，到6.6元沽出，回報足足有一倍。」
除咗銀行股，公用股同樣係好多網友嘅首選，網友JK1010笑言：「喺地鐵（066）IPO時買入，𠵱家都未諗住放，覺得佢回報唔錯，而且仲收咗佢唔少紅股。」
投機心態蝕錢離場
網友都話第一次買股，當然會係「安全至上」，不過，如果抱投機心態買啲高風險嘅細價股，就通常蝕錢離場。有人因為想搵快錢，第一次就買啲細價股，網友薩拉丁就好心灰咁話：「第一次學人買股，入咗首長國際（697），點知都係衰貪心同冇做足功課，最後咪蝕咗6千蚊囉。」網友hc8亦傷心咁話：「97年尾，以3.2元買入中油香港（135），最後蝕咗五成，好心痛呀！」