傳媒狗仔隊𠵱家無孔不入，仲有麗的電視時代嘅娛樂圈，清純簡單得多。喺廿幾三十年前，即係1979年2月19日，家燕姐同娛記吹水，話自己俾一個神經fans苦纏咗一年。據當年芳齡29歲嘅家燕（仲未要加個姐字喺前面）講，有個綽號「儍佬明」嘅男人狂寫無聊肉麻情信畀佢，搞到佢心慌慌。
為免遭癡情fans滋擾，家燕改咗幾次電話號碼，不過呢位仁兄咬實唔放，大膽到喺佢屋企樓下苦等，家燕出街時冒昧「撩」佢。自此家燕call的士時指明要搵強而有力嘅司機，順便做埋保鑣。家燕係陳年少女組合「七公主」成員之一，有瘋狂男fans唔出奇，𠵱家仔大女大，佢乜都唔怕啦。