今年拜年，撞口撞面的賀年佳句，肯定會「撞話開雙」。你不是名媛，不是去ball撞衫，奉旨唔使尷尬，雙方開口齊齊講「大家做好呢份工」，getthejobwelldone。
假如仍是待業之身，就祝對方you'llgetthejob，done。砌低姓梁與不是姓梁的對手，做硬呢份工，跳出踎躉行列。
湊巧親戚是當差的，唔，最好別提done。Done燉同音，保護曾特首落區做騷時的跌槍風波還未查個水落石出，警隊上下難免心情麻麻，實會有人懼怕秋後算賬被燉。新年流流，無理由咁無陰功，落井下石，賀人「陀好呢把槍」，「交好呢份report」。改賀「橫財就手」好了，暗喻就手的還有你把槍，千祈咪失威跌地。
豬朋狗友應節，索性熟不拘禮，祝死黨老友「付出代價」you'llpay，叫對方盡快豬年拉埋天窗，加入派利是一族，明年肯定唔見大筆，有出冇入，肉赤到喊。單身的豬朋狗友幸災樂禍，墮落得快樂。
謹小慎微的，則不妨語重心長，放棄老餅的賀句諸如「出入平安」或者「大吉大利」，改為「小心說話」，「ICAC」咁。兩句甚至可以當做揮春，張貼大門兩邊，矚目又有威勢。就算你夫家唔係姓羅，都肯定能杜絕白撞和失驚無神㩒鐘促銷的sale屎。