送狗迎豬，呢兩年個市好咗，市民怨氣少咗，不過期望都高咗。財爺唐唐𠵱家趕工炮製新一份財政預算案，喺呢個月28號就出爐。往年唐唐會安排記者去佢官邸拜年，記者有利是𢭃有料收，隨時滿載而歸。舊年特首連同三司一齊見記者拜年，記者問唐唐會唔會減稅，佢心直口快一句「心想事成」，畀人無限憧憬，當堂搶晒鏡。
唐唐舊年出晒位，今年卻玩低調，唔再正式安排記者去佢屋企拜年，官方講法係大年初一太近預算案公布日，財爺忙到一頭煙，謝絕應酬。今年人人伸手要減稅，唐唐老闆煲呔為求連任又猛開期票，出口術話要將標準稅率減到15%，唐唐俾人挾實，仲邊有心機拜年，新正頭任何祝賀說話都可能令納稅人無限聯想，一個唔小心講多錯多仲衰，閂埋門「做好呢份工」好過啦。