豬年大年初一，八方祝讀者豬年發過豬頭、豬籠入水、豬年順景、金豬臨門，八方就豬年繼續諸事八卦，恭喜發財。人人都想過肥年，政團政黨都唔例外，年年都擺年宵掘金。香港第一大黨民建聯最巴閉，年宵攤檔開幕都有高官剪綵，不過可能樹大招風，俾人投訴佢哋公然違規僭建，擺年宵都玩特權！
年卅晚八方去維園趁墟，「迫」到民建聯攤位附近，見到有位仁兄指手畫腳好勞氣，「我喺檔口前搭個帳篷遮雨，食環署見到要我即刻拆，民建聯嗰個就長擺，係咪有人大細超先？」原來佢係氦氣球檔老闆，啱啱俾食環署警告，佢偷唔到雞死死地氣拆走帳篷，點知食環署當民建聯個帳篷透明，「巡咗幾次都當睇唔到，有冇搞錯！」
「好天就唔會搭出嚟」
八方現場所見，民建聯真係好離譜，搭咗個巨型黃色帳篷，阻住人行花市。檔口負責人Florence同八方講，佢哋都有俾食環署警告，「叫到都要拆，個帳篷用嚟擋雨，好天就唔會搭出嚟。」食環署發言人強調邊個檔位違規都會警告，一視同仁。呢個講法同現場所見有啲出入噃。
勞氣嘢初三赤口再講未遲，八方以為政團政黨豬籠入水過肥年啦，點知旺丁不旺財，民建聯咁叠水，擺檔旨在宣傳，最受歡迎係免費派嘅環保袋，四萬個都唔夠派；富貴自由黨，使乜擺地攤搵雞碎咁多錢吖，賺蝕都冇相干。
處女下海嘅公民黨聽聞暫時平手，佢哋出咗一套兩隻賣68蚊嘅「黨杯」，分別印咗六個立法會議員嘜頭，銷量好飄忽，有議員喺度促銷好賣啲，否則就拍晒烏蠅。毓民領軍嘅社民連都係第一次擺年宵，阿牛話最好賣係T恤同毓民嘅書，暫時冇賺蝕，「希望年卅晚最後衝刺有好成績，食粥食飯靠呢鋪。」
八方喺維園見唔到白鴿黨蹤影，原來佢哋已經冇玩幾年，黨員話政黨擺年宵旺丁不旺財，又冇人願捱義氣睇檔，唔搞好過嘞。最長情係華叔，支聯會年年擺檔，佢年年幫手寫揮春，同爭取平反六四一樣，堅持到底！