今日豬年初一，恭祝豬年傳媒一片陳腔濫調，又話新春大吉，豬籠入水；又話豬年大運，龍馬精神，創意枯竭，嗌到人想瞌眼瞓。
點樣更好地慶祝豬年？最好嘅方法，係由特區三司十一焗發動全民，一齊向豬學習。
豬呢隻畜牲，有一隻可貴嘅品格，就係一生永遠追求溫飽，全無其他需求。正所謂「溫飽權係最大的人權」，呢一樣，豬呢隻畜牲一早就奉行咗千萬年，只要餵飽佢食豬餿，佢食完就瞓，大小便暢通，一生就十分快樂。
雖然到頭來難免挨一刀，食肉寢皮，但邊隻畜牲係唔會死嘅呢？豬呢隻畜牲，一早就對生死睇化晒，唔會追求「民主」，但求飲飽食醉。你話豬蠢？佢話你蠢至係真！
雖然鬼佬豬，同唐人豬有少少唔同，因為英國小說《動物農莊》裏面嗰兩隻豬，竟敢帶同畜牲作反，一隻叫「拿破崙」一隻叫「雪球」，不過唐豬就冇呢一種性格，至多有個豬八戒，除咗飲食、鹹吓濕、抽吓水呀咁，中西豬隻文化大比較，喺呢方面，不妨由啲學者話多啲嘢畀我哋聽，睇吓有乜啓示。
做豬你話幾幸福呢，有人飼養，免費供佢食餿水，佢就迫埋嚟搶食，可惜咁耐仲未進化到識得排隊，以致豬嘅食相，有少少爭議唧。點都好。民主是個壞東西，豬年來臨，唔要民主，寧要民豬，祝各位家肥屋潤，食多兩斤叉燒肥豬肉喇。