豬年新開始，孤家寡人嘅我求大俠周圍同球圈中人拜年，但就唔夠膽搵「萬人迷」碧咸講恭喜發財咯！事關銀河艦隊皇馬喺上周六嘅西甲聯同貝廸斯「和」氣生財打成0:0，「萬人迷」做咗紅牌阿姑，瞬間由上仗「七旋斬」罰球重出江湖嘅「最佳男主角」，變咗呢場嘅「金草莓男主角」！
獲隊友力撐應該正選披甲嘅「萬人迷」，上仗聯賽對皇家蘇斯達射入罰球幫球隊贏2:1，即成為各大報章頭條；然而，佢上周六第150次為艦隊上陣，整場表現唔曳，幾棍到肉長傳，兼且有一記右路地波助攻畀雲佬，唔係後者中楣，「萬人迷」應該威多舖；事與願違，佢完場前一刻喺對方禁區犯規，即時領紅被逐，轉眼間變成「金草莓男主角」獎得主！
罕有獲主帥卡比路辯護
披起艦隊戰衣第5度當「紅」嘅「萬人迷」，今次罕有獲主帥卡比路辯護：「我認為球證太快畀出紅牌，我喺電視睇番亦覺得唔多似。」
查實，球隊聯賽對上11次「讓球主客和」讓一球，從未贏過盤，確係濕滯，所以「萬人迷」無可避免成為外界嘅出氣袋！