【本報訊】美心集團繼日前年糕及蘿蔔糕一度缺貨「擠提」，連累顧客「冇糕過年」後，其快餐分店供應的盆菜亦懷疑導致多個家庭食物中毒，其中一個12人家庭，進食後5人狂屙狂嘔；單是聯合醫院已接收最少三宗個案，問題盆菜購自不同的美心快餐分店。有專營傳統盆菜的食家表示，相信今年農曆新年天氣炎熱，令盆菜易變壞有關。 記者：陳沛冰 林浚川 蔡建豪
洪先生一家早前從美心快餐北角分店預訂了一個約360元的盆菜、200元的東坡元蹄及168元的雞煲翅，準備全家12人年卅晚高高興興食團年飯。他向本報表示，前日下午6時按時到美心分店領取食物，但美心只能提供元蹄及雞煲翅，其後職員着等候良久的他先回家，盆菜製成後會送到洪家。
洪家12人進食元蹄及雞煲翅後，無人感不適；晚上8時半美心職員才將「暖暖哋」的盆菜送到家中，並附有一支溫度計，但單張內並無指示進食前要加熱。由於盆菜太遲送到，家人趕住團年，故沒有加熱盆菜便進食。
「阿媽屙咗十次好虛」
晚上11時洪家5名成人開始感不適，洪先生說「我由前晚到噚日朝早屙嘔咗十次八次，我阿媽都屙咗成十次，佢屙完之後個人好虛。」他懷疑盆菜的製作過程出問題，或製成後等太遲才送貨，令盆菜變壞。
洪先生的姊姊向本報稱，前晚吃完團年飯，他們往藍田友人家中，之後丈夫開始面部紅腫，呼吸困難及肚屙，立即送他往聯合醫院急症室求醫：「好奇怪，我哋去到急症室，講咗個情況，啲護士就話『又係美心盆菜呀，第四個美心盆菜出事，呢個最勁』。」醫生指其丈夫可能是食物中毒或敏感，需留院治療。
洪姊續說，「上到病房，咁啱有一個女人行過，佢話聽到我老公食美心盆菜有事，就問吓我，原來佢個仔都係食咗美心盆菜後出事，佢哋喺藍田間美心快餐度買。」其丈夫昨晨出院時，她聽聞仍有一名疑因進食美心盆菜後食物中毒的婆婆，因仍感頭暈而未能出院。她稱：「個盆菜送嚟時都好亂，好似就咁擺咗一大堆食物，三分之一係豬手、五花腩同蓮藕」，懷疑製作過程有問題而出事。
有聯合醫院醫護人員向本報表示，年卅晚有三名來自不同家庭的市民聲稱進食美心盆菜後出現屙嘔，另有一人亦因食外賣盆菜中招。
美心集團發言人回應時強調洪先生的個案只是個別事件，並無接獲其他顧客投訴。其北角分店經理收到投訴後即時登門慰問事主及了解詳情；堅持取走事主「食剩」的盆菜，是公司希望進一步調查，了解食品質素是否有問題。
美心：分店自行製作
發言人指，美心西餅早前出現年糕「擠提」，與美心快餐盆菜延遲交貨並無關連。「雖然啲原材料係集團提供，但啲盆菜係由各區分店自行製作交客，並唔係由集團統一運送到各區。」強調美心集團物流運輸系統並無問題。
「食神」梁文韜表示，多名市民進食盆菜後疑食物中毒，與近日天氣炎熱有關：「大集團為咗可以短時間內大量生產盆菜，會用蒸嘅方法製作盆菜，但咁樣做會令到盆菜產生大量水份，遇到呢幾日溫度咁高嘅日子，好快就會變壞。」他表示傳統圍村菜式開鑊煮，「開鑊煮盆菜會收水，水份較少，可以擺耐啲。」
衞生防護中心發言人表示，前晚至今暫沒接獲有人進食盆菜後懷疑食物中毒個案。
