送狗迎豬，年三十晚，大欖隧道外，竟發生九巴撼貨櫃、片皮批頭大慘劇，上層乘客飛墮，一死多傷！
年三十整單咁嘢？十年為一大運，記唔記得十年前嘅初二，花車遊行，撞死遊客，新年期間，出現公共血光之災，對於社會運程，梗係大吉利是！
喺送狗迎豬之際，大欖車禍，死人冧車，喺玄學上，呢隻係一個「拉豬賠狗」之局，證明狗年隻狗，去得唔甘心，臨落台，要整一整蠱上緊位嗰隻豬，邪一邪佢！天意示警，今年煲呔連任，重新埋位，而對三司十一局，邊個行將叮走嘅，臨走會唔會暗中整鑊甘嘅煲呔歎；實行豬狗俱焚、犬豕同煲，打工仔就好請教吓龍師傅，睇吓點避嘞！
喺風水學上，今次九巴出事，個位置喺正車頭左上角，即是西北，呢個方向叫做「玄角飛星位」，大欖隧道又在港九西北，邪上加邪，點會唔出事？正所謂金剋木，不幸喪生嘅乘客，一定係條命屬木，屬木嘅人唔好坐咁多巴士，應該搭地鐵，所謂土生木，咁就冇事！
好彩架巴士有個叫王大喜嘅乘客，個名改得吉祥，大叫一聲「撞車呀」，飛身走位，驚醒埋後面一個瞌眼瞓嘅，一齊撲閃，雙雙避過一劫。架車爬頭嘞，額角越來越高嘅煲呔，睇位呀！