動畫《忍者龜》3月23日美國上映，網友Paullock喺《香港討論區》留言話，呢套戲收唔收得對意馬（585）嘅影響好大，收得當然冇死喇，唔收得嘅話就弊傢伙。不過，佢相信意馬會係3月最佳嘅短炒股，有機會突破呢輪徘徊4.2至4.6元嘅沉悶局面。
主席減持套2500萬
網友胸毛一人亦幾睇好意馬3月嘅走勢：「呢隻股係投機短炒嘅『佳品』嚟㗎！兩日內就曾經幫小弟賺到2千幾蚊。」意馬3月嘅股價掂唔掂，當然要睇吓套《忍者龜》嘅票房收唔收得，有睇過預告片嘅網友大隻金就好滿意《忍者龜》嘅水準，話會對股價有幫助，「套戲掂呀！估唔到香港嘢都可以做到套幾優質嘅動畫，似足荷李活貨色，股價實掂！」HDSI亦同樣咁講：「套動畫水準都唔差嘅，當然就冇Pixar咁勁啦！但都拎得出嚟見吓人嘅，點都好過以前嗰套《龍刀奇緣》。」
意馬未轉型搞動畫前叫寶途，係整聖誕樹，公司轉型後，股價一直低迷，但去年10月起，股價由2元起急彈至𠵱家嘅4.41元，升幅達1.2倍；隨着動畫《忍者龜》上映期越嚟越近，今年嘅股價就升咗25%。今個月初花旗增持意馬嘅股權，由0.33%增至9.55%，相反，該公司主席高偉豪喺過去3個禮拜就11度減持股份，套現2500幾萬。中銀國際上月中畀意馬嘅目標價係4.6元，家吓已經冇乜賺錢水位。截至去年9月底，公司虧損1148萬元。
彩星股價飆升五成
同樣食住《忍者龜》條水，幫佢出玩具嘅彩星（635），踏入07年，股價就飆升五成，上周五報1.2元，里昂上月尾訂佢嘅目標價係1.3元，仲有6%嘅上升空間。