初一行大運：走勻大嶼山紅磡觀塘　<br>好運湧住來

初一行大運：走勻大嶼山紅磡觀塘　
好運湧住來

恭祝各位豬年行好運！今年想行財運、桃花運、健康運定係貴人運？好運冇人嫌多，當然最好係樣樣都有啦！趁今日大年初一氣勢旺，一於跟玄學家林炳南師傅行番個大運，由大嶼山玩出紅磡再入觀塘，去勻豬年各個吉位，包保你今年好運齊來！唔好諗喇！再唔出門口就錯過好時辰喇！

記者：林思樂
攝影：何家亮
Model：Tanya、Will、Koey、Brad、Chris

第一站：旺財、旺貴人、旺健康

時間：7am-1am
地點：昂坪360、天壇大佛

今年西南位旺財旺貴人旺健康，大嶼山喺正香港西南位，運氣大盛，入去兜番轉今年會順風順水！林師傅話見到有山有水嘅地方零舍旺，唔使講梗係坐昂坪360最好View啦！昂坪360來往東涌與昂坪，全程需時25分鐘，途中經過東涌灣，更可以俯覽東涌山谷、昂坪高原、機場和天壇大佛等，見山又見水，今年仲唔財運亨通、事事遇貴人兼龍馬精神！喺纜車站一出就到達古色古香的昂坪市集，影靚相一流，今日仲有多項新春慶祝活動，到處喜氣洋洋！

●見到下一個吉位天壇大佛喇！

昂坪360即日至年初七安排

身心啓廸之旅套票
（包括來回車票、與佛同行及靈猴影院景點門票）
成人$155
小童$80
長者$118

雙程車票票價
成人$98　
小童$50　
長者$78

開放時間：9:00am-6:30pm
備註：為疏導人流，每個車廂最少坐10人，並會加快車速。
查詢：21099898

到天壇大佛吸靈氣

由昂坪市集行5分鐘就到天壇大佛。要近距離參拜大佛先要行百級樓梯，大佛第2層法界堂是國寶展覽廳，第3層是供奉佛陀舍利的紀念堂，拜完大佛落樓梯後往右行就是寶蓮禪寺，善信可以參拜大雄寶殿內的三寶佛和羅漢堂內的千手觀音，祈求闔家平安。
拜完佛一見到旁邊的齋堂，就想起又到醫肚時間！午飯齋菜毋須預訂，分$60/位的珍味素和$100/位的貴賓齋，菜式各有不同，特別推介貴賓齋的紫菜鮮竹件和香荔芋桃茸，色香味俱全，想不到齋菜都可以咁吸引！另外，不可以錯過寺外小食店的山水豆腐花，又甜又滑，仲有多款樣靚嘅糕點㖭！

●天壇大佛人傑地靈，大家來到即刻擺陣吸收天地靈氣！

●要近距離參拜大佛先要行百級樓梯。

寺外嘅小食店有豆腐花及糕點等售賣，味道不太甜剛剛好。

（左）芒果馬豆糕$10/3件
（右）紅棗桂花糕$10/3件

●寺內提供的齋菜賣相吸引，其中的香荔芋桃茸很好食。

天壇大佛開放時間：
10:00am-5:30pm

寶蓮禪寺開放時間：
9:00am-5:00pm

齋堂開放時間：
11:30am-4:30pm
查詢：29855248

第二站：旺桃花

時間：2:30pm-4:45pm
地點：紅磡海逸酒店

正所謂哪個少女不懷春，好多年輕人最緊張的就是桃花，模特兒Tanya等咗半日終於忍唔住問林師傅邊處最旺桃花，林師傅話：「豬年東南位桃花最旺今日吉時係3-5pm，土瓜灣至紅磡一帶，同埋將軍澳都好旺桃花，望到海的地方仲零舍旺！」下晝3至5點擺明係下午茶時間啦！於是一行人即刻去昂坪360纜車站下面的巴士站搭E23巴士，落紅磡海逸酒店睇海景歎TeaBuffet！農曆新年去酒店食飯至着數，同平日一樣只會加一，唔會加二加三咁肉赤！海逸酒店的凝醉廊下午茶自助餐$138非常抵食，有多款中西菜式熱盤，甜品選擇更多不勝數，最好嘅係有無敵大海景，師傅話見到水更旺桃花，話唔定邊欣賞維港景色邊歎Buffet的同時，有緣人就喺左近！

●林師傅話：「想今年行桃花運，就立即喺昂坪360纜車站底的巴士站搭E23號巴士去紅磡黃埔花園巴士總站，收費成人$18，車程約１小時！」

●海逸酒店的下午茶自助餐非常抵食，一向有好多食客捧場！

凝醉廊（29968439）

地址：紅磡德豐街20號海逸酒店1樓
下午茶自助餐供應時間：2:30pm-5:30pm
收費：成人$138　小童$90

●海逸酒店位處海旁，無敵海景可以令桃花運旺上加旺！

第三站：旺喜慶（升職、結婚、生仔）

時間：5:30pm-9:30pm
地點：觀塘apm

升職加薪係每個打工仔嘅願望，加上有好多人都覺得豬仔有福氣，打算今年生番個，所以喜慶運絕對唔少得！
林師傅話下晝5至7點東位，即喺觀塘見到火或者燈光的地方最旺喜慶運，5至7點就嚟天黑，全觀塘最燈火通明的地方一定係apm，於是眾人即刻去紅磡碼頭搭15號巴士落觀塘地鐵站，成人收費$5.5，車程約半小時！商場內有20多間食肆，可以食埋晚飯先走，特別推介和民居食屋的火鍋，皆因見真火比見燈光仲旺喜慶，還有「家傳滬曉」的鮑魚魚翅都好正，新正頭梗要食豪啲！