派對遊戲：07全新電子版大富翁<br>個個碌爆卡　賓架豬籠入水

派對遊戲：07全新電子版大富翁
個個碌爆卡　賓架豬籠入水

新年假期梗要約埋大班老友玩餐飽，唔拜年、唔賭錢、唔唱K仲有乜好玩？其實傳統益智遊戲變化仲豐富、體感仲實在，就好似每年都有新版本推出嘅大富翁一樣，今年登場嘅電子版放棄傳統現兜兜畀錢嘅玩法，買地起屋全部碌卡，連過路費、罰錢都係碌卡過數，雖然個個都玩到唔覺意碌爆廠，不過女士們肯定過足Shopping癮！

記者：周達之、區佩嫦
攝影：何家亮
模特兒：Edmon、Chimpy、James、GoGo

洗腳唔抹腳
《新世代電子版大富翁》

時代進步，家陣買乜都用信用卡同八達通，現金都係留番嚟新年封利是罷啦！面世70多年的大富翁遊戲亦與時並進，今年推出電子版，唔再現兜兜用假銀紙結算，一切交易全部電子化。每位玩家都獲贈電子卡一張，而收入支出用部「電子銀行」按兩個掣就掂，完全符合現代人生活方式。你睇阿Chimpy幾咁鍾意呢個新版大富翁，佢話碌卡找數嗰下感覺，同去Shopping碌卡如出一轍，大腦釋放出嘅快感激素同樣令人咁High喎！

辣㷫位
爭做賓架

以前無人願做賓架（Banker），麻麻煩煩又得個睇字，但試玩當日Edmon同James就爭住做，全因個個同佢碌卡買嘢，似足有錢佬RichardLi！

●1人1張Credit卡，最多可6人同玩。

●碌卡過數快夾準，以後唔使再慢慢數錢喇。

●硬卡板棋盤製作精美，連屋仔同棋都好得意。

●就係多咗呢部似計數機嘅「碌卡機」，全部交易喺呢度完成。

大富翁新世代電子版$329.9
辣㷫指數：★★★★★

雙雄決戰
《終極電流棒》

古語有云：「男人恩怨，用電流棒解決！」James同Edmon為咗爭做Richard，於是就以呢款雙打電流棒作比試。一般電流棒遊戲只得一碌棒，玩家自自閉閉一條友玩，家陣有雙打版本，兩碌電流棒互格，可以俾佢兩位阿哥用嚟對戰較量，贏咗嗰個咪係Richard囉。

辣㷫位
茅招致勝

玩電流棒最怕人出術，阿James玩嗰陣碌棒同條電流線離行離列，結果快而準咁到達終點，Edmon識穿後當然抗議上訴，賽事作廢，Richard之爭仍未解決。

終極電流棒$169.9
辣㷫指數：★★★★

跌死馬騮
《快落猴子》

男仔鬥餐死，女仔懶得理。GoGo就同阿Chimpy行埋一邊玩另一款《快落猴子》。玩法超簡單，擲骰決定抽出邊隻顏色籤，但要抽條籤出嚟但又唔可以俾隻馬騮跌落嚟。聽落好似好低能，但查實要決定抽邊條籤先至可以令到隻馬騮跌落而其他籤唔跌落地，實在當考判斷力！

辣㷫位
難定輸贏

到真正試玩時，發覺原來快落猴子有個盲點，就係猴子跌唔跌落嚟，一樣有難度！GoGo同阿Chimpy玩之前無講明要跌還是唔跌先為之勝出，結果女子組亦同樣爭執起嚟！

快落猴子$99.9
辣㷫指數：★★★★

最緊要定
《UNO層層叠》

正所謂：「女人恩怨，用UNO解決！」UNO你玩得多，層層叠你亦玩唔少，咁UNO＋層層叠你又玩過未？就算未玩過呢隻遊戲嘅GoGo同阿Chimpy，亦一望就知玩法係以UNO形式，決定要抽出邊種顏色或數字嘅長方條，然後再叠上面，當然唔可以俾條木柱冧落嚟啦！既然玩法咁簡單，於是佢哋就決定用佢嚟解決先前的恩怨。