一個家庭得兩公婆，買樓要考慮嘅因素可能唔係咁多，不過，如果有細路，問題就會變得複雜，好似網友sam9035，因為小朋友即將出世，需要搵個新居所，廿四孝老竇老早就諗埋校網問題，位處小學34網嘅何文田，係sam9035心水之選，可惜佢銀根唔係好鬆動，可以選擇嘅物業唔多，大概只有居屋俊民苑同欣圖軒；另外，屬於31校網嘅油麻地駿發花園，亦係sam9035考慮之列，因為近幫佢湊細路嘅外母，究竟點揀？《親子王國》嘅網友都畀咗唔少意見。
YYB認為應該揀何文田︰「為阿仔第時讀書着想，我係你會揀何文田，駿發嘅地點唔係咁好，太近廟街，品流比較複雜。」
欣圖軒環境寧靜
另一位何文田街坊PJ亦附和︰「完全同意！我都係住欣圖軒！周圍環境都算寧靜！最重要係無街童流連，街坊都斯文啲！」
但網友BillieBug就大唱反調，「好似我昨日傍晚，由欣圖軒乘的士到油麻地地鐵站，足足坐咗30多元，仲要塞成半個鐘，因為呢十年以來，窩打老道同培正道，係未有過一個星期唔掘路，仲要加埋過時過節勁塞車，的士又好難等到，小巴又要排大隊，我個人覺得不甚方便！」佢建議不妨先喺何文田租樓，如果適應到，再買樓都未遲。
若果sam9035想用200萬喺何文田置業，可以揀9年樓齡嘅欣圖軒、13年樓齡嘅太平花園，但只有500餘呎；600餘呎之選有太平閣、九龍總商會大廈同俊民苑，不過樓齡較高，介乎16至27年。講到尾，買樓唔應該單憑校網作考慮，好似畀科技大學破格取錄嘅小發明家陳易希，及近日被中大破格取錄嘅數學天才陳瀚道，兩位都唔係出自傳統名校，但一樣有出色表現，所以話，讀書叻唔叻，始終係靠自己！