藝人周潤發
「最緊要係身體健康，個個香港人都可以豐衣足食，唔使憂兩餐。」
藝人楊千嬅
「希望以後唔好再水腫、勁靚、一家人可以身體健康、所有食得嘅嘢唔好再有毒。」
食神梁文韜
「狗年經濟蓬勃，人人搵到錢出街食多咗、食豪咗，豬年梗係希望市道可以繼續好，大家賺多啲、食好啲！祝大家豐衣足食，年年有餘！」
藝人劉德華
「希望全世界嘅人同動物都健健康康，豬年開始冇豬瘟、冇雞瘟、冇瘋牛、菜冇毒。人人都有一份工，百業興旺，零失業，大家都開開心心賺到豬籠入水，然後齊心做多啲好事。」
摘星少年陳易希
「狗年我有幸成為首位獲得科大取錄嘅中五學生，雖然惹來各界冷嘲熱諷，令我感到有啲壓力，但家人同朋友嘅關懷，亦令我學會珍惜眼前人。豬年我會努力讀書，繼續研究。」
藝人古天樂
「祝願大家同我一樣可以身體健康，同時希望今年可以拍到一部代表作，最重要就係行番個甜蜜嘅桃花運啦！」
本地孕婦
權益先鋒劉太
「希望豬年政府可以做多啲嘢，市民繼續支持我哋本地大肚婆爭取權益！我今年38歲係高齡產婦又係第一胎，真係好辛苦，喺度奉勸大家有仔趁嫩生！」
立法會議員
詹培忠
「豬年願望最緊要梗係個股市要有上有落，千祈唔好停咗唔郁，等人人搵到錢，大家開心。我希望到咗08年，大家可以繼續支持我，等我冧莊做多屆立法會議員，咁就最開心嘞！恭喜發財！」
