新正頭恭喜說話多多益善，初二開年，八方再向讀者拜年，祝各位萬事勝意、大吉大利，今年好過舊年。聽日赤口，大家講嘢就要小心啲嘞，成日口舌招尤嘅人物，好似阿瑟王李國章咁，最好收吓把口，唔好吓吓出律師信兇人，佢個堂妹資深大律師李志喜Gladys睇唔過眼，未到初二就同佢開年，叫佢唔好咁霸道。
Gladys同八方講，李國章畀律師信教院副校長陸鴻基要人收口唔係好啱，事關政府已經成立獨立委員會審呢單嘢，阿瑟王同陸副校都應該要出席聆訊，向主席胡國興大法官畀供詞，阿瑟王𠵱家出律師信，聲言保留追究誹謗法律責任，好似想先發制人揞住人把口咁，「唔係幾恰當，如果調查結果證明李國章清白，佢先搵律師追究都未遲。」
陸鴻基同Gladys都係公民黨創黨黨員，公民黨最多大狀，若然陸鴻基打官司，真係未驚過阿瑟王。Gladys話冇同陸鴻基傾過呢單嘢，如果佢要幫手，相信唔少黨友會拔刀相助。佢又話近排冇搵過堂阿哥李國章。道不同不相為謀，佢兩個確係冇乜好傾。
李家團拜大陣仗
李氏家族係香港名門望族，每逢新年，數以百計嘅族人濟濟一堂團拜好熱鬧，不過呢啲場面近年少見嘞。Gladys記得細個時去李家西摩道大宅拜年，李家有條家規，細路要逐一向長輩叩頭拜年先有利是𢭃。Gladys喺英國讀番書，廣東話係有限公司，當時唔明搞邊科，總之爸爸媽媽叫佢大年初一醒定啲，唔好講錯說話失禮人。
豪門是非多，李家後人唔係個個咁好景，Gladys話以前過年前，媽媽都要為封利是而惆悵，細封嘅話會俾人閒話。不過最令佢頂唔順嘅係燒炮仗，串炮仗由三樓垂落地下，點着後響足幾分鐘，耳聾咁滯。
去李家拜年充滿童年陰影，去公公婆婆度拜年就開心得多嘞，因為婆婆會請外孫女食朱古力，公公親手整嘅臘肉好正，𠵱家諗起都仲lamlam脷。Gladys好感歎咁講，最可惜係家傳秘方已失傳，往事只能回味嘞！