按政圈慣例，風頭人物會喺大年初一着到喜氣洋洋咁同市民拜年，不過一班近日俾人質到口啞啞嘅新聞人物，就未必敢喺呢個時候見街坊嘞，除非諗到計解圍又唔同。好似廣管局主席馮華健咁，廣管局話船頭尺講粗口唔出得街，俾文化界狂轟，馮主席死撐自己按本子辦事，八方覺得若然馮主席要同市民拜年，最好拎住張「百無禁忌」揮春，以示支持言論自由，對市井俚語百無禁忌。
阿瑟王得償所願
另一個風頭躉非阿瑟王李國章莫屬，佢句「Youwillpay」搶閘成為政圈最hit口頭禪。阿瑟王咁鍾意人pay嘢，佢同人拜年，一張「財色兼收」揮春又點少得呢？至於特首候選人梁家傑，輸梗嘅佢開口埋口2012雙普選，雖然八方覺得難少少，但袋巾梁咁有理想，值得鼓勵，所以佢拎「夢想成真」揮春同市民拜年最啱嘴形！至於略為過氣嘅前任政務司司長陳方安生，當日見步行步，今日梁家傑夠票入場，佢無奈斯人獨憔悴，最好拎張「一馬當先」揮春，提醒市民唔好學佢咁瞻前顧後，做嘢要快手！