聽日就係豬年，我阿鵬預祝各位心想事成。碰啱呢兩晚有直播，我哋球彩台會同大家過新年！呢兩晚我哋有線都有新嘢，𠵱家有得玩葡超時亦有得睇喇！睇住直播就玩得更得心應手啦！
送狗迎豬呢兩晚我會向西甲埋手。皇馬今季由卡比路領軍，防線明顯好咗，但前線歇冬後6場波入得4球，仲有3場食白果！雖然佢今場對手貝廸斯自費南廸斯執教後表現唔錯，連續保持5場不敗，贏過華倫、摸和巴塞同西維爾，但今季作客麻麻，淨係贏過榜下游塔拉戈納同畢爾包，真係揀唔落手！兩隊今季3次交手都係開入球「細」，以皇馬近期嘅攻力，加上貝廸斯踢穩守突擊，開入球「細」都好高機會吓。
數近期當旺，我首選基達菲。佢哋歇冬後9個盤贏咗8個，近期兩度擊敗華倫同奧沙辛拿。整體人腳唔算太好，但勝在夠攔打，往往有意想不到效果。向來靠主場搵食嘅畢爾包今季居然作客好過主場！至今主場淨係贏過維爾瓦，近況就高低立見喇！
阿鵬
有線球彩台主持
電郵：[email protected]