廖碧兒、馬浚偉、葉翠翠和徐子珊等，前晚在灣仔拍攝無綫新劇《舞動全城》，劇情講述馬仔向廖碧兒求婚成功，眾人即跳舞狂歡。馬仔擁着廖碧兒共舞時，一不小心跣腳並失重心，整個人俯身攬着廖碧兒，二人還胸貼胸。問到廖碧兒可有請馬仔食波餅？她說：「冇啲咁嘅事，跳舞一定有身體接觸，之前馬仔都有同我傾過，我係唔會介意。」
放電未夠班
至於曾在無綫慈善騷上與李彩華大跳懷舊舞的馬浚偉，被指右手放在對方的重要部位，而這次他與廖碧兒共舞又發生小插曲，馬浚偉說：「因為地下有個坑，搞到我鞋底都甩咗兩塊膠，後來都要換鞋，我次次跳舞都好邪，好彩都係跣一跣，大家都冇受傷。」
此外，陳法拉近日被指是姣精，頻放生電，她說：「我性格唔係咁，我電力唔夠，嗲呢啲嘢扮唔到。」對於被指是「葉璇二世」，問陳法拉覺得對方為人怎樣？她說：「我做唔到佢，佢好有成就。」
採訪：王崇穎
攝影：陳偉權
