怕人多怕迫都好，年三十晚最好嘅節目始終係行花市，有氣氛有平嘢執更有行大運之意。行開年宵都知道，花市所賣嘅嘢價格飄忽，好多時都睇你嘅講價功力。今日就搵嚟《ILoveUBoyz》嘅阿Jim、Donald加埋兩個妹妹阿E同阿Wing，喺維園來個講價大比拼，見到佢哋可以平幾多，大家去到買嘢都心中有數啦！
記者：許維雅、劉昱蘭
攝影：陳盛臣、楊錦文
鳴謝：叱咤903《妹妹妹妹》
Model︰Aries
Donald+阿E越行越順
老實講，起步時見到阿占同阿Wing係威係勢，並不睇好Donald同阿E；中段一直聽到阿占講價大叫「$20啦！又搞掂！」更加憂心，因為Donald同阿E樣樣嘢都貴過$20……勢估唔到佢哋靠尾段轉運，成功用人氣同美色，免費搶貨！更以一朵包住T-Back的玫瑰出奇制勝，對手阿Wing見到都目瞪口呆，心服口服！
1.$25一支講價後$50兩支？
原價$25/1支的揼骨公仔，經Donald一輪壓價，最後鬼馬阿姐話︰「好喇！$50兩支」竟然成交！𢱑晒頭，點解Donald同阿E都照買？原來呢檔係宗教團體籌款攤位，佢哋就話做善事無所謂，但一開波就咁使咗1/6資金，Fing錢Fing得太豪爽喎！（211&270號BlessingCorner」）
交易︰揼骨公仔2支
原價︰$25x2支
賴皮價︰$25×2支
2.$28易發價買豬頭
經過善款事件後，Donald同阿E決定之後以$28（易發）或$38（生發）做講數底價，測試目標係搶眼「豬肉檔」發記，一埋去老闆未答價錢就話「唉，$28喇！」、「28好意頭喎！發過你啲豬頭喎！」老闆先係一呆，跟住清醒番︰「大佬，做生意唔係齋講意頭吖？」一輪舌戰後，$28戰略又得逞喎！（213號「發記」）
交易︰吹氣砧板連豬肉刀
原價︰$88
賴皮價︰$28
3.Donald奸計：學生易埋手
同豬肉檔交易成功但得來不易，今次決定向後生仔埋手，貪人哋涉世未深！「長發包」一班靚女見到Donald，即時Fing晒包叫佢埋嚟，Donald︰「幾得意喎個檔，整埋個焗爐喺檔頂，」後生囡開心晒，後來先知係個講價局，大家喺$28同$38之間爭持不下時，阿E就話︰「一人一步$33喇，」懶公平咁又奏效。（231號「長發包」）
交易︰長發包公仔1個
原價︰$68
賴皮價︰$33
4.阿E勁冧天使棒
Donald講價期間，阿E唔多專心，不停望實隔籬檔，Donald串佢吹氣棒有乜好睇，阿E︰「有埋對翼㗎。」Donald行埋去殺價一句「唉，$28喇！」點知俾老闆聽到頭先個成交價，大喊︰「隔籬檔你都畀$33喇！」用完硬用軟︰「檔都未開好，第一單生意咪壓咁多價喇。」最後以高價$38購入阿E心頭好。（230號）
交易︰天使吹氣玩具1套
原價︰$68
賴皮價︰$38
5.轉運蜥蜴
轉運位嚟喇！之前咁辛苦，今次就不費吹灰之力。人紅有着數，老闆一見到Donald就叫佢埋嚟，示範點玩蜥蜴仔，Donald見個蜥蜴頭仲識擰擰吓︰「可以同我隻貓玩喎。」老闆即刻話送條畀佢，再送多條畀靚女阿E，價都唔使講仲打孖上㖭。（235號「幸運一條龍」）
交易︰蜥蜴玩具2條
原價︰$48×2
賴皮價︰$0！
6.T-Back玫瑰有噱頭
阿E行過見到玫瑰都唔覺得有乜咁特別，但一班後生仔即刻圍住佢話︰「係條T-Back嚟㗎」，咁有Gimmick，兩人即時返轉頭買，原本都已經$28唔貴，殺價殺到$20，後生仔亦爽快收錢。睇睇荷包，買咗半個鐘仲剩番成$100！（256號舖）
玫瑰T-Back1條
原價︰$28
賴皮價︰$20
7.買定獎盃預祝
既然淡淡定有錢剩，去到最後一檔諗吓點Fing，買個獎盃預祝成功攞吓景。經過咁多訓練，Donald問價氣定神閒，繼續︰「唉，$28喇！」「幫你做宣傳喎，收番你錢嗱！」有必勝心態果然唔同啲。（269號舖）
交易︰吹氣獎盃1個
原價︰$68
賴皮價︰$28
陳刀為$100判Donald勝！
結果：評判陳刀話佢哋兩組嘅戰利品數目差不多，但Donald嗰組剩番$100，梗係佢哋贏啦！陳刀講笑話：「其實佢哋用$100收買咗我！」加上Donald嗰組醒目地買埋個吹氣獎盃，想唔畀佢哋贏都唔得！（嘩，呢個評判連數都唔計就判！）
其他正年宵 旺角花墟諗頭多！
九龍區花市首選旺角花墟公園，有差唔多200檔亁濕貨檔位，地方係比維園細，但攤位集中啲，撞口撞面有頗多中學生搞小生意，但唔好睇小人，入貨都幾有諗頭，唔係獨沽一味入豬仔，但依然樣樣講意頭。
膠火箭一飛沖天
年宵Product好少咁有動感，用腳踩住氣泵，膠火箭就會泵上天，成日都吸引到一班小朋友圍住爭住玩呢個「一飛沖天」，一踩完就抬頭「嘩」一聲，自然成功成為全街焦點。（43號檔「有金執」）
吹氣煲呔有權
煲呔係權力象徵，香港人見到煲呔都會諗起曾生，諗起佢就會諗起大權在握，近期佢又係新聞人物，同學仔都想沾沾佢人氣整旺個場，入咗呢個吹氣煲呔飾物。（43號「一豚和氣」）
麵粉花眾仙祈福
屋企擺水仙花賀年，寓意群仙入室好意頭，想仙子們長年相伴，不如買水仙麵粉花擺幾耐都得，人手做又顯手工功架。另外亦有巧手手繪花樽，全部都好精緻。（35號「日本麵粉花」）
吹氣豬仔BB專用
原本印有豬頭Logo的絲絨坐墊系列，細細件唔係咁起眼，但一見到有個Baby坐得咁開心，即刻想買幾套。（72號檔）
大吉大利「摺」豬頭
呢隻吉豬認真好意頭，拆開一層層包住豬頭的「果皮」，豬仔就會眯起雙眼好似向你笑咁樣，記得笑住迎豬年。（55號「OHMY吉吉」）
環保豬電筒
講得環保即係唔用電芯，齋靠動力產電，一見到即時諗起星爺個太陽能電筒呀！要用時得閒重複按多吓旁邊的手掣，豬鼻孔就會自然發光。其實㩒㩒吓都幾攰！（52號「PI豬」）
