夢想人人有，不理你是10歲抑或80歲，一如溫拿五虎人生歷練之豐富也不例外，而某程度上由心之渴望也可約略窺見斯人的心境。如果上天償他們一個心願，溫拿會祈求甚麼？
陳友：來世再聚
「如果有來世，我希望可以再有一班咁嘅老友，一齊組隊咁嘅Band。」
健仔：荒島釣魚
「我想有一個島，係一個荒島，畀我釣吓魚，好開心咁一個人輕輕鬆鬆咁過。我真係太鍾意一個人，冇煩惱，唔使煩惱自尋，我唔會寂寞㗎，老婆想見我咪得閒搭船嚟探我囉。」
阿倫：開騷成功
「希望今次演唱會成功，因為呢個演唱會有幾樣嘢想表達，點解我哋要堅持跳舞，係想話畀後一輩嘅歌手聽，好似我哋溫拿咁有資歷嘅藝人，都咁有鬥志，希望觀眾感受到我哋嘅誠意，後輩嘅歌手要加把勁，要有拼搏精神。」
阿強：繼續自在
「我鍾意自由自在嘅生活，𠵱家都過緊，希望可以維持落去。」
阿B：退休玩樂
「我想退休，退休唔代表唔做嘢，係想做一啲自己想做嘅嘢，鍾意玩音樂就玩音樂，鍾意同溫拿開騷就開騷，其餘嘅時間就陪屋企人遊山玩水，幾寫意。」
