Jim+Wing乜都嗌$20
規則：猜包剪揼分成兩組，阿占跟阿Wing一組，Donald跟阿E一組。每組有300大元，限時半小時之內買盡今年維園花市特色產品，贏輸由評判陳刀一手決定，毫無準則，各安天命。
阿占跟阿Wing起初充滿信心，阿占做指揮，亂咁指一個方向就出發喇！
1.「理籠怡」出師不利！
阿占跟阿Wing一個箭步，突然見到「理籠怡」檔口，佢話個名幾過癮，停低望望。見到個吹氣皇冠，劈頭一句：「$20！」可惜以戒煙為題材的吹氣玩具檔唔肯減！
2.吹氣玫瑰𠱁女
一支支Cutie版的吹氣玫瑰花被阿Wing睇中，阿占第一時間問價：「$18支？$10啦！」檔主一口應承。阿占亦爽快畀錢買兩支，最後用《蘋果日報》名義再敲詐多兩支，講價過程十分流暢。（216號舖）
交易：4支吹氣玫瑰花
原價$18支
賴皮價$5支（共$20）
3.「豬籠入水」夠意頭
行過成班妹妹仔揸住個豬籠吹氣的玩具檔，立刻停低：「呢啲好意頭！」。成班妹妹立刻捉實阿占唔放，大叫$68，好抵！阿占二話不說：「$20！《蘋果》呀！幫你賣廣告呀！就$20啦！」妹妹仔亦買佢怕爽快成交。（261號舖）
交易：豬籠入水吹氣玩具
原價$68
賴皮價$20
4.比賽不忘跟財神合照
呢檔乜都無得賣，只得3隻財神公仔周圍走，原來係Sell同財神合照留念。即影即曬收$48，阿占都係嗰句：「$20！」，仲話自己要扮老爺坐中間。明明鬥緊買嘢多，無啦啦走去影相嘥咗$20，咪就係因為咁輸咗囉！（258號「財神照住你」）
交易：財神合照1張
原價$48
賴皮價$20
5.強搶金莎花合照當$10
適逢情人節前夕，不少檔口都以冧女招數作招徠，金莎花再次吸引到阿Wing停低。阿占被檔口妹妹捉住合照，邊影邊話：「影相要收番$10呀！」。影完即衝去檔口放低$20：「唔理呀！影完相點都要攞番兩支花走呀！」老闆娘只好無奈接受。（257號「利是花」）
交易：利是花兩支
原價$40
賴皮價$20
6.女生至愛波波點
今年波波點大熱，呢檔就以全波點小物、袋及衫殺出重圍，阿占跟阿Wing都大讚佢哋醒目。阿占一貫講價手法並未得逞，於是攞住張$20紙：「你攞住先啦！」妹妹仔：「我唔要呀！」佢惟有無奈攞出餘下散紙：「$32喇！」妹妹仔都未及反應，阿占求其放低就大叫：「走呀！」又賴皮成功。（249號「送dot迎珠」）
交易：得米豆豆咕𠱸
原價$88
賴皮價$28
7.花市必買五代同堂
阿占一見到五代同堂就興奮，話自己年年都買。佢攞起標價$168嘅一支，面懵大叫：「$20啦！」檔主睬佢都儍還價$148，佢立刻採取懷柔政策：「唔好講咁多，影張相先啦！」再𠱁老闆娘：「$88啦！講價講到口亁，要留錢買嘢濕濕個口喎！」佢仲自己攞起鉸剪：「得啦！我哋自己剪落嚟！」糾纏數分鐘後，$108成交，老闆娘仲送支水畀佢濕口。（304號「芬芳葵園藝」）
交易：五代同堂
原價$168
賴皮價$108
8.買嘢食𠱁阿姐
亁貨檔口有很多賣「鹹濕小吃」，唔使一定去逼熟食檔嘅。阿占見肚餓撲埋去買嘢食，又同班阿姐玩一爛餐。阿姐：「你係明星嚟㗎喎！」阿占：「係！我係《最緊要正字》！」班阿姐明知佢講大話，都笑得鬼咁開心。（241號舖「和興隆」）
交易：檸檬亁
原價$28/磅
賴皮價$20（送多幾安士）
維園其他好檔
《51號舖》Gundam機械人頭
獨沽一味賣吹氣盾牌同劍，雖然單調，但有一大個Gundam高達作舖頭招牌。$70/套
《豬頭幫》全場最大豬頭
吹氣玩具遍布維園，想突圍越誇張越好。呢檔個吹氣大豬頭嘅Size係全場之冠，不過只得兩隻，價高或有誠意才先有機會奪得。其他產品有迷你豬頭仔、波板糖同Headphone等吹氣玩具，價錢由$28至$48。吹氣豬頭棒棒$48
《日本千葉園》熱爆蘭花
濕貨檔口方面以賣蘭花嘅檔口最多，其次係一般常見嘅年花，如桔、銀柳等，價錢跟往年差不多。大部份都係賣最傳統的紫色蘭花，呢盤顏色咁特別嘅叫沙拉，價錢$1,280。
施丹頭槌食時勢
同樣賣吹氣玩具，但唔玩豬，而轉玩施丹。施丹舊年世界盃一個頭槌搞到紅牌出場，呢個吹氣施丹頭槌咁抵死，買嚟扑吓扑吓都過癮。$68
中學生抵死創意
香港華仁書院嘅學生，自己設計Product，在年宵推出，夠晒認真。141號「豚園」舖抵死TissueBox，雙孔設計，眼仔線條簡單，就出到豬仔流鼻涕兩行嗰辛苦樣，好搞笑。$55
新界區花市
沙田源禾遊樂場花市
日本迷你杜鵑夠獨特
沙田源禾遊樂場花市年宵嘅濕貨檔遠比亁貨檔多，最適合買年花。當中以售賣日本迷你杜鵑嘅《新花放》最搶眼。迷你杜鵑係日本迎春花，每盆都經過5年以上嘅折枝種出一個個十分漂亮嘅粉紅花球。而亁貨檔中，大部份都係賣「口立濕」嘅小食檔，只有一檔賣吹氣玩具及光纖花嘅「金豬滿屋」做獨市生意。
荃灣花市新界最大
新界區龍頭大佬位於荃灣沙嘴道遊樂場，約有180個亁濕貨攤位，年宵開幕第一日已經人頭湧湧，想迫唔一定要去維園，新界同樣人氣逼人。
將軍澳精選豬仔
將軍澳寶康公園，地方僅僅大過西貢同大埔，但都唔難搵到獨家可愛豬頭，地方細都值得一逛，咪比大場惡晒。
