蘇玉華憑《美女廚房》效應，榮升美女廚神，一班親朋戚友紛紛要趁新年一嚐她廚藝，蘇玉華遂向曾參加日本《鐵人料理》的許成師傅討教，還合力炮製「十全十美全豬宴」，過程完全冇難度！
榮升美女廚神的蘇玉華，今個農曆新年將忙到上氣不接下氣，因她要預備多場盛宴。蘇玉華日前說：「往時親戚朋友嚟屋企食飯，多數叫外賣或盆菜，但參加完《美女廚房》後，個個都話要試吓我嘅手勢，每次閒閒哋要煮20幾人飯，真係盛情難卻。」
大師傅讚專業
為招呼親友，蘇玉華遂向95年代表香港參加日本《鐵人料理》的許成師傅偷師，炮製一席迎合豬年的「十全十美全豬宴」，10道菜式包括化皮乳豬、蜜椒玉鴛鴦、XO醬蜜豆豬爽肉、清潤豬肺湯、黑椒素豬扒和珠圓玉潤（湯圓）等。
炮製蜜椒玉鴛鴦期間，許師傅叫蘇玉華切豬排骨，當她一見那把幾斤重的豬肉刀時，即嚇到嘩嘩大叫，擔心連菜刀也拿不穩，師傅笑說：「《美女廚房》蘇小姐，一定識嘅。」蘇玉華惟有硬着頭皮一試，想不到師傅更大讚手法專業。
許師傅教蘇玉華炮製多款以豬做材料的菜式，大功告成後，兩人便坐下試菜。對於當選廚神以來不停有機會跟大師級廚師合作，蘇玉華說：「農曆新年影咗好多煮食專輯，同好多好勁嘅師傅合作，學識煮好多菜式，對我嚟講幾大得益。」
必買髮菜應節
過年時，家家戶戶也喜歡吃髮菜，市面有不少假髮菜，可能含對人體有害色素，即使真髮菜本身也沒營養價值，不過蘇玉華說：「新年流流食少少應吓節都無妨，但我叫咗媽咪唔好自己買，等我買畀佢，我諗啲人唔會搵我笨啩。」
採訪：戴彩煥
攝影：葉君海
場地：美麗華酒店東宮
服裝：裕華國貨
髮型：RentonHungbySalonIde
