今日話係年初一，其實丁亥豬年已在二月四日下午一時半來臨，故此新春八字，不以今日為準。
舊年年初一（○六年一月二十九日），本欄標題係：「今年要老實」，內容大抵係講丙戌年立春八字，甲木身強，推論○六年好過○五年，老實人會行運，壞人必定受揭發，無所遁形，不過木旺土死，地產就麻麻，但木生火，屬火行業興旺。現在睇番起嚟，叫做唔錯得晒，○六年嘅房地產業，除咗豪宅炒上之外，其餘無論成交量與成交價，毫無起色，認真麻麻。不老實，呃神騙鬼，貪污人士又真係無所遁形噃，上海陳良宇案轟動一時，大陸不少地方高官下馬，本地亦有前法官騙綜援被判刑。屬火行業又點呀？據講電訊業屬火，睇隻中移動就知啦。
過去的已經過去了，丁亥年又如何，依舊請教八卦邱，八卦邱話丁亥年立春八字乃係丁亥年壬寅月己巳日辛未時，五行金木水火土齊全。亥屬豬，立春日係己巳日，呢隻豬係土豬，土頭土腦，養到肥肥白白就俾人劏，大家因住。凡春天己土，以丙火（太陽火）為尊，得太陽照曬，陰土方有生氣，但忌見壬水（江湖之水），因以水一沖，己土（田園之土）無存矣。八字之中，巳寅藏丙火夠晒照，但有壬水喎，點算？幸好丁壬化木，亥寅亦化木，故此壬水之力冇晒，己土尚可保存，但受制於木吖。計來計去，立春己土唔算係強土，普普通通而已，以此引伸，○七年頂多可以維持，唔容易超越○六年，本來土生金，利金融銀行業，但己土唔算強，生金之力不大，麻麻哋啦。
聽完八卦邱講，○七年未必有○六年咁好景，保本為上，慎防豬頭豬腦咁入咗天仙局。
講起豬年，知道中央政府為了照顧少數民族回教徒，唔准中央電視台嘅廣告有豬出現，亦唔想提到豬年。估唔到政治正確到如此程度，咁樣講，豈非牛年會得罪印度教？有謠言話中央考慮刪除十二生肖中之豬年，左丁山點都唔信，若將豬年變貓年、豹年、象年，傳統民俗習慣不如全部廢除，改行西方嗰一套啦。