好多揸車搵食嘅司機，都鍾意掛啲風鈴、八卦等小擺設喺車內，祈求平安大吉路路亨通。方海閱師傅就話，要保平安，最好係掛「平安符」、《般若波羅密心經》或《大悲咒》其中一樣，風鈴八卦則少掛為妙。司機大佬又點睇呢？
當裝飾無問題
我本身唔迷信，不過朋友送咗個《般若心經》小擺設畀我，照掛喺車度當裝飾。風鈴會發聲我唔會掛，叮叮聲會好易分心，反而更危險。
公司唔畀掛
唔掛唔掛，我唔會掛，因為公司有套安全守則唔畀司機掛呢啲嘢，想安全最緊要打醒精神而唔係掛平安符，就算公司批准我亦唔會掛！
唔掛迷信物
揸咗十幾年車，不嬲都唔信風水，從來無掛呢啲迷信嘢，揸咗咁多年咪一樣平平安安！最緊要自己小心駕駛，唔好超速累人累己。
信自己多啲
揸車三十幾年，大細車乜都揸過，但就從來無掛過平安符，公司車固之然唔畀掛，就算自己車亦無掛，信自己嘅技術多啲！
最怕騷擾
「我唔會掛，點解？因為架車係公司車唔係我嘅，做乜要掛啲私人嘢喺架車度？況且有嚿嘢擺吓擺吓都幾騷擾㗎。」
訪問結果
訪問過幾位司機，原來好多人都唔會掛啲風水嘢喺車度，部份原因係屬公司車，司機唔會揸固定嘅車，其次係大多認為飾物會擾亂視線、影響駕駛安全。到底掛唔掛好，真係隨各位車主習慣囉。