踏入豬年，傳媒照例又會報道搶閘出世的嬰兒。今年豬仔抑或豬女成為金豬族呢？豬很少生一胎，最好是三隻白白豬同時出閘，成為豬年搶降成功的三胞胎，一次過，交足曾特首叫人生三個的「功課」。
生仔趕生豬的風潮，看着叫人奇怪。你睇豬肉永遠比牛肉便宜，和牛當旺，豬肉鬆依然冇乜人吼，豬肉亁更加冇人鍾意。矇豬眼橫睇掂睇，都不算靚人一族，好彩潮流興整容，矇豬眼可以一刀切變牛咁眼。而矇豬也不是沒粉絲的，韓國天王阿Rain就是矇豬代言人。矇豬眼無論如何不會在十二生肖中包尾，肯定有雞眼墊底。
豬的身形千年如一日，絕對不會隨波逐流纖體，豬腩肉變瘦豬。衰豬也不會變乖豬，幼稚園賞罰分明，曳仔的黑豬永遠被白兔貶低。雖然寶貝小豬嘜可愛，但賣豬仔可不是玩的，內地團領教過了，這個金豬年，零團費的，肯定是「應節團」。青海四川來的窮豬，香港人炒國企賺了那麼多，怎忍心送他們去屠房。豬扒就不同了，那些在旺角Ｄ場打躉晚晚啪丸的男女，奇怪大部份都是豬扒或者牠的同宗豬八戒，好心請商家贊助他們返大陸整容，這樣的豬扒希望工程，蠻有意思，各界應當共襄善舉。
豬模樣兒幾Ｑ，老是笑笑口，劏豬咁聲難聽，這個丁亥年，務請大家盡量少食豬少做事，多運動多行善，做好「人」呢份差事。