最新一集足球遊戲《WEX》自於XB360上推出，除咗一班XB360機主玩得過癮，更吸引唔少機迷主機連遊戲一併購入，證明XB360都有唔少機迷球迷；所以最近微軟就專登為班《WEX》Fans搞咗個爭霸賽，仲請來香港著名球星助陣，於遊戲內外大Show腳法，可惜竟不敵十指靈巧的港姐Suki！
記者：許福合
攝影：何家亮
50人爭奪《WE》之王
為咗爭奪《WE》王之稱號，一早有超過50名參加者到現場等候參賽，經過一輪5小時馬拉松式比賽後，終於汰弱留強，誕生兩名《WEX》高手柯進威同張禮豪，晉身決賽！決賽有生鬼旁述森美，當然亦唔少得一班靚女啦啦隊，仲由Suki做隊長。
不過《WEX》高手唔知係咪因為唔習慣咁多人睇住有啲怯場，兩邊各自選用名牌球隊紅魔鬼同車仔出戰，攻勢無組織，前鋒又把握唔到入波，正如森美話：「兩邊表現得最好係龍門，不過好似《WE》龍門係唔使自己控制喎！」最後雙方合演咗一場悶賽，要踢12碼分勝負，最後由紅魔鬼柯進威勝出！
亨利配Suki 《WE》王失威
《WE》王誕生，後台5位球星已急不及待，包括歐偉倫、文彼得、黃[!9A47]宇、鄭兆偉及楊正光，齊齊衝出來就即場表演吓腳法，貌似亨利嘅鄭兆偉，頭頂腳踢都出埋，仲話要挑戰《WE》王。以1對5，對《WE》王似乎唔太公平，球星們決定派出鄭兆偉出戰，微軟方面更安排Suki同亨利合組明星隊。上半場先由Suki對《WE》王，美色當前，《WE》王變得好唔專心，仲不分敵我，教埋Suki點踢，森美就陰陰嘴笑話：「捉住佢隻手教佢喇！」，雖然Suki有高手教路，不過攻方同守方都分唔清嘅情況下，都幾難組織到攻勢。上半場，《WE》王可能教Suki教到忘記自己方位，竟「鬆章」將波帶入自己龍門，明星隊憑住Suki魅力領先一分！
鄭兆偉狂攻無入球
《WE》王失威，打算下半場追番，不過下半場改由鄭兆偉出戰，雙方都為咗面子而戰，果然緊張好多，雙方經常響中場爭奪，睇住XB360畫面，球員動作夠真，真係差啲以為睇緊球賽直播。估唔到鄭兆偉真人腳法了得，打《WE》技術都唔錯，仲憑住佢嘅足球智慧，組織到唔少攻勢，而《WE》王認真起來，雙方你來我往，真係相當精采。
而最出色球員仍要數雙方龍門（其實係自動），救出唔少險球，最後球星對《WE》王之爭雙方交白卷，最後埋單由Suki上半場取得入球仲贏埋《WE》王，戰果真係幾出人意表！
現場花絮 森美：「拎Suki返去。」
講波佬表演亦可令球賽球生色不少，好似今日明星隊對《WE》王，森美除咗充當主持外，仲憑佢口才令現場氣氛熱鬧不少，開波之後，佢更兼任旁述。
估唔到森美嘅旁述都幾專業，更可拋出唔少足球術語，更經常玩Suki，好似見到《WE》王對Suki照顧周到，響領取獎項時，《WE》王剛好站於Suki身邊，森美就話：「你份獎品就響你身邊，你可以拎佢返去。」
搞到Suki幾咁無癮，而《WE》王就只有偷笑。
鄭兆偉心水：國米、AC
個樣同亨利好似孖生嘅鄭兆偉，響《WE》最愛球隊唔係阿仙奴，而係國米同AC，一向都係佢心水之選，因為兩隊球員平均速度高，以速度重於一齊足球遊戲，會好着數！
歐偉倫心水：可惜無南華
講歐偉倫最嘅愛球隊，梗係南華，可惜《WE》出咗咁耐，都未收錄香港球隊，佢就退而求其次，選擇皇馬，擁有世界級球星支援嘅皇馬，雖然近排戰績麻麻，不過遊戲內就可以起死回生！
黃囗宇心水：AC米蘭
黃囗宇最鍾意打《WE》意甲聯賽，因為防守堅固，即使有時電腦出茅招都未必一定輸梗，而最常用球隊有AC米蘭，攻守都咁平均。
文彼得心水：巴塞
文彼得就話攻擊係即最佳防守，揀球隊玩一定選擇攻擊功最強，所以巴塞一定係佢不二之選，淨係睇遊戲內哨牙仔朗拿甸奴動作同真人一樣，已經夠過癮。
楊正光心水：車仔
車仔近排被曼聯搶晒風頭，不過遊戲內仍然係最好用球隊之一，楊正光就話車仔條中場線人選真係唔錯，多種陣式都可以搵到適合人選，適合領隊球員二合一嘅玩法。
Profile
主機：XB360
開發：Konami
類型：運動
人數：1-4人（Live支援2人網上對戰）
售價：$349