馮仁昭四圍超
陳慧珊秘密嫁經理人　舊愛陳豪：快啲生BB - 馮仁昭

陳慧珊（Flora）近排俾記者影到同經理人鍾家鴻（Mike）拍拖睇戲，當時女方暴脹，又猛咁用圍巾遮住個肚，惹起大肚疑雲。原來佢哋嘅關係喺上年已經升級，唔止係工作夥伴咁簡單，Flora日前喺雜誌訪問直認上年同Mike喺美國低調結婚。曾同Flora傳緋聞嘅陳豪聽到消息當然開心喇，噚日佢仲喺電話度話：「聽到消息好開心，恭喜Flora。佢都要趁後生快啲做媽咪，或者今年生番個金豬BB。」

想生BB

Flora喺01年同前夫鍾偉明離婚，再見亦是朋友，Mike原來都係鍾偉明嘅好朋友。Flora話之前喺杭州拍劇，前夫鍾偉明帶埋女朋友嚟探班，兩pair情侶又一齊過聖誕，Flora同Mike嘅婚禮，Mike嘅前妻都有去參加。Flora話舊年嘅婚禮只係一個小型派對，加上兩人都係再婚，唔需要咁隆重，舉行婚禮只係作為一個回憶，所以當日佢哋只係着便服，參加嘅都係佢哋美國嘅親友。
外表洋化嘅Flora仲話一定會生BB，咁樣先算真女人，唔知近排佢身形忽然暴脹，係咪夢熊有兆呢？馮仁昭希望佢可以好快如願以償，做個金豬媽咪。