大年初一，百業停工，其實好鬼悶。指定節目除咗有親朋戚友之間互相搶錢之外，好彩仲有花車巡遊有街去吓。今年花車主題多樣化，12生肖、皇冠花園、08奧運乜都齊，率先落街直選，睇吓大家最Buy邊款，結果Cutie款贏晒，當中12生肖花車最得人心，有12動物撐場，多啲嘢睇無咁悶咁話！
記者︰劉昱蘭
攝影︰何家亮
Model︰Gobby、Nicole、Kiss（IntermediaGroup）
至Cute！
卡通角色細路最冧
豬仔固然係香港旅遊發展局花車嘅主角，但佢今年無霸晒個場，其餘11生肖，都一齊喺喜迎丁亥豬年，唔再全狗全豬咁單調，色彩繽紛、熱鬧喜慶，抵佢Cute爆全場。花車造型Keep番中國傳統特色，底座仿照珍貴的玉如意而設計，象徵萬事如意。
海洋公園威威賀生日
海洋公園今年30大壽，特別增派樽鼻海豚、海獅、鎚頭鯊、大熊貓、水母、鸚鵡、綠海龜、熱帶魚8位最受歡迎大使，仲有百人花車隊伍，大鑼大鼓大合唱，陪佢一齊喺花車同大家拜年。
廸士尼舞台變花車
Cutie花車點少得廸士尼，將樂園內的Magic帶出尖沙嘴，車上圖案用咗樂園中隨處可見嘅新春菱形Pattern，加埋專用舞台燈搬埋上車，將歡樂閃得更遠。
至Grand！
50萬打造泰式黃金車
今年泰皇80大壽，黃金花車專為慶賀今年的大日子，除咗金色夠閃，風一吹珠片一閃同樣搶眼。咁重本，係因為成架花車用咗過百人同埋1個月時間全人手做㗎。
西式花園公主出巡
比華利山別墅好有公主Feel，花車嘅大皇冠，一睇就知花車以皇宮府邸為主題，豪華宏偉。情人節餘溫未過，小心另一半見到花車，話要喺比華利山一嘗公主滋味。
駿馬運財迎豬年
賽馬會花車以金色巨型馬蹄鐵為骨幹，巡遊時車上會載住馬術大使、馬術運動員同埋財神，寓意馬迷新一年財運齊來，奧運比賽「馬到功成」。
Sell特色！
昂坪360出動
花車細細，但又有齊晒昂坪360嘅特色，綠色為主啓廸身心郊遊樂，特色架空纜車當然唔少得，花車兩旁有齊市集主題景點。
迎奧運大喜事
中國旅行社以2008北京奧運為主題，兩旁一圈圈悅目璀璨的燈光，象徵住奧運舞台上每個的精采節目，下面嘅波浪，祝願香港乘風破浪攞多個金牌。
國泰航空一飛沖天
香港為航空界龍頭大佬咁有地位，國泰花車固然唔少得。花車以國泰嘅歷年發展為主題，到時有機組人員、艙務員及地勤人員參與滙演，全場最有儀態演出非佢莫屬。
睇表演！
火熱美女啦啦隊
有人氣先夠熱鬧，除咗花車巡遊，各表演隊伍嘅精采表演，都係今晚的主角。27個團體有歌有舞有造型，全場熱鬧指數即刻升溫。
全女班踩高蹺
新西蘭帝后高蹺舞蹈團全女班表演，按照森巴節奏，表現太陽高升的主題，14位表演者唔同嘅高蹺高度，分別穿上唔同顏色的服裝，步步高陞嘅日照光芒，代表新一年的來臨。
日式傳統雀舞
仙台雀跳舞團演出嘅雀舞難得一見，喺一種模仿麻雀在地上跳躍民族舞蹈，以扇子、日本傳統太鼓和笛子模仿小鳥拍翼，要落足眼力。
日式新年祈福
日本有一個黑崎祇園山笠節，傳統上都會有男士隨着鼓樂及管樂，推住以武士人像裝飾的閃耀花車，祈求在新的一年有健康的體魄。
西班牙古典音樂
首度來港的西班牙阿拉伯表演團，演奏節奏特別的古典音樂，以定音鼓以及西班牙古老雙簧管，奏出源遠流長的文化特色。
街坊直選最愛花車
注意！今年睇花車要畀$150！
日期︰2月18日（星期日）大年初一 時間︰晚上8時至9時30分
巡遊路線︰由香港文化中心出發，然後沿廣東道朝九龍公園徑前行，最後返回梳士巴利道
門票︰每位$150（每人每次最多可買4張門票）
售票處︰銅鑼灣地鐵站及尖沙嘴天星碼頭的旅客諮詢及服務中心