溫拿五虎齊集，笑到你肚痛！
我說：「我想睇健仔除眼鏡個樣。」
阿B毫不客氣：「健仔副眼鏡要嚟遮眼袋㗎。」
阿倫加多兩錢力：「健仔個眼袋長到落肚臍，要嚟袋住啲利是㗎！」
眾人大笑，健仔繼續拿着揮春擺出很英的姿勢。
類似笑料，層出不窮，阿B謂：「我平時好文靜，黐住佢哋都變咗13點！」
譚詠麟、鍾鎮濤、彭健新、陳友及葉智強，1973年組成溫拿樂隊，33年後仍開心聚首團年。
吃盡酸甜苦辣，友情依然相關照，這是Wynner'sTheme。
「世事無常才能成就了知己。」是新歌《33轉》的歌詞，很貼切！ 撰文：蔡如玉
有人說：「十年修得同船渡，百年修得共枕眠」，又有人說：「百世修來同船渡，千世修來共枕眠」，不管同坐一條船要積十年抑或百世的緣份，溫拿五虎同坐了33載音樂船，最難的是感情維繫。說真的，夫妻也不一定能共度數十載而情不變。
阿B唱唱吓去大便
溫拿五個百厭星圍在一起就笑不停，這可能是他們情誼永結的原因，當中最多的是屎尿屁笑話，有一宗放屁奇案更是至今尚未偵破，涉案人是阿倫及陳友。話說一次，眾人一起乘坐升降機，忽然「噗」一聲巨響，寃臭無比，人人火速掩鼻，阿倫第一個指着旁邊的陳友大叫：「哦！」陳友瞪大四隻眼回敬：「咩呀？」阿倫即謂：「你唔認？」如此「咩」來「咩」去，到現在仍沒有人知道「兇手」到底是陳友抑或阿倫。
又有一次，溫拿五虎在馬來西亞登台，開騷前盡嚐當地美味海鮮，演出時唱至一首由阿B邊彈琴邊唱主音的歌曲，本來一切順暢，阿倫突發現阿B不見了，只好努力裝鎮定代唱下去，唱到最後一句，阿B又突然現身鋼琴前繼續唱。原來這位主音會在20,000觀眾面前突然消失，竟然是去了大便。他說：「當時邊唱邊急，忍咗好耐頂唔住肚痛，咪用九秒九速度衝上山頂廁所解決囉，半首歌冇咗主音，好過主音喺台上賴屎啩。」
健仔感激阿倫義唱
青葱歲月老早已過，溫拿如今33周年，由今晚開始於紅館唱足13場，內容自是緬懷舊情。他們趁開騷之前圍爐團年，邊吃邊回首，將未曾講的情深說話釋放，說感謝或者說句對不起。
阿B與健仔率先要多謝阿倫，阿B謂：「記得80年代左右，溫拿散檔之後，我第一次喺伊館幫ICAC唱場騷，之前未試過個人演出，真係周身唔自然，諗住搵人幫手做吓嘉賓壯吓膽，點知個個都要拍戲，卒之我唱到一半，見到阿倫着住件保安隊嘅戲服嚟到幫我手唱，我見到佢成個人都定晒，真係好多謝佢。」
健仔也憶述：「當年我都係第一次做個人騷，喺大專會堂，開騷前一日好衰唔衰急性腸胃炎，入咗醫院吊鹽水，屙到冇氣又冇力，擔心緊第二日唔知點開騷，阿倫嚟到醫院探我，第一句就問我得唔得，使唔使幫我唱一半，其他嘢完全唔使講，呢件事我永遠都記得。」
原來阿倫喜歡義唱，他咧嘴笑謂要感謝做了上市公司主席的陳友，忙昏頭仍堅持每星期抽空兩天為今次演唱會綵排，盡可能出席所有宣傳，阿倫謂：「我都做過幾間公司主席，年尾時候真係忙到唞氣都唔得閒㗎。」阿強向來不擅辭令，問他有沒有情深說話未曾講？他靦覥笑說：「要同陳友講唔好意思囉，以前同佢發生過小小爭執，當時我皮膚敏感發𤷪𤺧，後來冇事啦。」問他究竟發生甚麼事，阿強望着陳友尷尬說：「打交囉，不過𠵱家冇嘢啦。」
50周年唱到老人院
再三追問，阿強仍垂頭不好意思說詳情，陳友沒好氣的笑，叫他不要再提，目擊證人兼溫拿發言人阿倫見狀幫忙解畫，他笑說：「嗰陣拍戲，陳友扮盲嘅，要咪埋眼摸阿強塊面，點知手指尾篤咗入佢鼻哥窿，佢就rocky上身，一拳打埋去，唔係打交，係打人，哈哈。」陳友即接口：「我要同阿強講多謝，唔係佢打我，我都唔會有今日，哈哈！講笑啫，我要話佢知，呢單嘢根本唔係問題，叫佢唔好放喺心上，唔係其他幾個死仔成日提住，我哋都唔記得啦。」
阿B謂阿強性格沉默寡言，內心相當重情誼，他說：「四年前我破產嘅時候開兩場騷，阿強退休移民咗去澳洲，其實我冇同佢提過開騷，但佢知道我開騷，就自己買機票飛返嚟香港支持我，當時佢出現真係令我好感動，好感激，我哋五個真係一切盡在不言中。」
雖說33年不易過，但50年可能眨吓眼就到，屆時五人差不多年過70，溫拿50周年演唱會有可能嗎？陳友說：「唔係我哋決定做唔做，係整定嘅，係個天要唔要我哋唱。」樂天的阿倫則說：「唱又有乜所謂，一齊喺老人院唱都得㗎。」
攝影：陳偉權
協力：胡比
場地提供：香港太子酒店香味屋
