榮獲今屆奧斯卡最多八項提名嘅歌舞片《夢幻女郎》（Dreamgirls），睇落好似好賀歲：靚人靚歌配靚景，戲名又心想事成夢幻成真鬼咁好意頭，但其實故事道盡樂壇天后為名利而不擇手段，甚至犧牲友情同自尊嘅娛樂圈血淚史。 撰文：戶川淳
下月1號喺香港上映嘅《夢幻女郎》，雖然拎咗奧斯卡八項提名，係今屆之冠，女主角BeyonceKnowles本來好搶鏡，不過就未能入選競逐最佳女主角獎，反而由選拔show《一夜成名》（AmericanIdol）出身嘅新星珍妮花克遜（JenniferHudson），佢嘅女配角獎就十拿九穩，因為早前佢已經橫掃演員工會獎同金球獎等多個大型頒獎禮。
珍妮花初登大銀幕已唱得演得，技驚四座，搞到Beyonce眼都紅，盛傳佢因為咁同珍妮花不和，早排珍妮花去日本宣傳套戲時，Beyonce都冇去，實行有你冇我。《夢》片又係講佢兩個由老友為爭上位而變成仇人，真係戲內鬥到戲外喎！
講番套戲，呢齣改編自百老匯上演25年、獲獎無數嘅同名歌舞劇，好多讀者可能未聽過，但有睇過80年代無綫電視劇《香江花月夜》嘅話，就會發現《夢》故事根本大同小異，同樣係講三個天涯歌女本來係好姊妹，但因為爭仔追名逐利而反目成仇，最後各有命途。
影射騷靈歌后
不過梅艷芳、蔣麗萍同景黛音今次變成R&B天后Beyonce、珍妮花同AnikaNoniRose三位黑人女星，而曾江嘅經理人角色就變咗由影帝占美霍士（JamieFoxx）去演。而向來演開搞笑角色嘅愛廸梅菲（EddieMurphy），今次玩認真演騷靈天王，仲要沉淪毒海，演技令人耳目一新。
《夢》嘅編劇當然冇睇過梅姐演戲，個故事其實係影射騷靈歌后戴安娜羅絲（DianaRoss）同佢以前隊組合TheSupremes嘅成名史，今次齣劇搬上銀幕，班底都非常強勁，由《芝加哥》（Chicago）編劇、金像得主BillCondon自編自導，而齣劇嘅原裝作曲家HenryKrieger更為電影版撰寫咗四首新歌，其中《LoveYouIDo》、《Patience》及《Listen》齊齊入圍奧斯卡最佳原創歌曲提名，當中又以描述Beyonce飾演女主角Deena心聲嘅《Listen》最熱。