官恩娜誇張耳環
「呢對耳環係香港設計師設計，係手製成品，好重民族色彩，容易襯衫，嚟緊都好興呢類配搭，好似我今日着嘅民族衫就可以簡單佩襯，屋企買咗好多同類飾物，多到用唔晒，越誇張我越鍾意，例如大圈設計都好靚，其他類型嘅耳環我就鍾意鑽石，一粒就可以，唔使太誇張。」
蘇志威升值Rolex
「呢隻錶係我嘅終極心頭好，喺10幾年前買都要成4萬蚊，買嗰陣時真係幾肉痛，不過真係鍾意咗好耐，所以立心買咗佢。呢隻錶嘅好處係襯乜嘢衫都好睇，穩重又得、潮流又得。最好就係有升值能力，𠵱家全新正價大概賣緊6萬。」
鄧麗欣闊身頸巾
「我一向都好鍾意買頸巾，好多時冬天我都會用唔同款式嘅頸巾去襯衫，呢條毛毛頸巾係我朋友之前去日本買畀我嘅手信。我一向偏愛大條同比較闊身款嘅，呢條頸巾嘅特別之處就係有埋對手套，可以話係一物二用。」
黎姿巨型手錶
「我鍾意戴手錶多過戒指飾物，尤其係一大揪嗰種飾物就最怕，手錶又可以襯衫，用途實際好多。我個人比較鍾情白色表，同埋最好隻錶面係大大隻款式嘅，襯起衫嚟好有型格。至於錶面，我就會揀睇落去亁淨冇太多花巧嘅。」
採訪、攝影：何永寧、李珮洳、魯萍
