劉德華年年不停做做做，今年當然也不會停，拍戲、開騷、接廣告和出唱片，暫時粗略估計，他在豬年收入至少超過一億港元。豬籠入水的他不愛亂花錢，最大開支是供養父母、投資基金及公司營運，不過這位鑽石王老五，原來身上沒甚麼現金。
豬年人人都想豬籠入水，劉德華向來被視為工作狂，每年檔期都密麻麻，今年當然不例外，工作已由年頭排到年尾，除了拍電影《刺馬》及《見龍卸甲》外，年中開始又舉行內地巡迴演唱會，暫定20場，還未包括聖誕檔期在紅館預定的15場個唱。唱片方面，華仔暫打算推出一張國語和一張廣東碟，又接了五個香港及內地廣告，尚有數個廣告在接洽中。
「我只識做做做」
多勞自然多得，以華仔接戲片酬定價1,200萬，廣告每個收1,000萬，演唱會每場收100萬來計算，粗略估計他今年最少賺超過1億元，華仔笑說：「咁快幫我計數？想搶我個會計飯碗呀？」問他這是比去年賺得多還是少？他說：「真係唔知喎，其實我年年都冇計，公司有會計同我處理財務，我好少睇數，只係識做做做，哈哈。」華仔最豐收一年是賺多少？他說：「我驚你打劫我呀，唔話你知。」
懂賺錢也要懂花錢，否則那只是一場數字遊戲，華仔謂有一個花錢方程式，每年收入的流向都一樣，其中一部份要供養父母，一部份用來投資基金，一部份用作公司營運，他說：「投資基金嗰度啲數好煩㗎，我都唔識，總之大部份錢都會存晒喺一個基金度，攞唔到出嚟，不過係穩陣嘅，為未來作打算嘛。我平時身上好少現金，試過一毫子都冇，因為我都冇乜機會使錢。」
10萬元獎下屬
自己賺得多，作為老闆的華仔也不會刻薄員工，早前其公司團年，他就自掏腰包10萬元抽獎，他說：「大家辛苦咗一年，最緊要開心啫。」
採訪：蔡如玉
攝影：林德雄
協力：王連連
服裝提供：連卡佛
