年卅晚我發了個好夢。夢中，我在玩具反斗城中，赫然發現有JeremyScott的totebag賣，並且只賣39蚊一個，而全場竟然冇其他人識貨，得我一個人如獲至寶大手購入，嘩，還有幾個款呢，有JeremyScott的新招牌──仿Snickers朱古力的Logo，好可愛呢；又有一個成架黃色運泥車形狀的，咦，都OK喎；還有好幾個款式，醒來後忘記了，只記得個個都靚……因為冇人同我爭，所以我每款都買了一個，還意猶未盡，買多一個畀Eason啦，又買多個畀阿徐啦，又買多個畀昭仁啦……然後就醒來了，笑醒的。
你唔覺得呢個係好夢咩？我覺得呢個係好好夢喎。喜歡時裝，起碼有這點好處，生有可戀，而且不難滿足。
請戥我高興，正如梁漢文告訴我幾年前在法國吃飯遇上朗拿度並得到合照，講的時候眉飛色舞猶如小fans，我也戥他高興一樣。
時裝與愛與隔籬枱
不只一次因為餐廳太細，桌子之間距離太近，而被迫偷聽到鄰枱人整餐飯的對話，沒有重心沒有內容沒有主題沒有共同熱愛的對象，基本上，悶，我當時的感覺是，怎可能專登約些人出來談一整晚如此沒趣的東西？OK，你可以覺得我又看不起人，或者「子非魚，blahblahblah」，好，我硬食；但那一刻我真的慶幸，我生命中起碼有一樣我肯定熱愛，而且遇上志同道合的人總可以談個不完（猶如六歲時找到newbestfriend）的東西──衫。
可能等同於你的golf你的護膚品你的遊戲機你的濕地公園或你的whatever，總之，有所愛就好，沒有就不好，只要有個錨，是不是時裝沒有所謂，當我得戚或自以為是都好，請變成坐在我鄰桌明明唔相識，但話題有趣得我想搭嘴的人，謝謝。
第一次
喜歡買衫不是很高級的情操，起碼在小學教科書中，這種嗜好還不及集郵或者玩業餘無線電值得嘉許，但我與「惡習」之間，也許有些可堪尊敬的聯繫，當你知道衣服曾經帶給我何等的快樂。
你記得你的第一件名牌嗎？
我記得。清清楚楚。顏色質感細節，得到之前的期待，第一次觸摸的震撼，近距離欣賞時視覺上的貪得無厭，幻想明天再約會時的……Um……和味！
……一如你記得你的初吻，或者……
你記得你的初夜嗎？
並不是每一個人都夠幸運可以找到一件事，令他覺得人生「值回票價」的，在你眼中，我的精神支柱或者低層次，但我總算是找到了。
被人笑我「為衫打工」笑了20幾年，我都慣了，還嫌他們刻薄得不夠傳神呢，刻薄這等粗重工作，梗係等我嚟啦，我其實是「為衫做人」的，有些事情我肯做，有些人我肯見，有些場合我肯去，都只不過因為第一次可以有機會着着某件買咗未着過的衫而已，而必需要着過晒啲新衫，才有藉口買更新的衫呢。
除了信仰，還有類似的精神力量嗎？
初戀無限復活
初戀，只得一次，而很多人的終極目標還是要settledown的，只有在時裝世界，初戀可以是不老不死身無限復活，少數道德上容許不停換對象來延續火花的事情。
最近作歲末掃除，摷到件織滿細G字的Gucci紅色絲絨恤衫出來，我笑說：「潮流興vintagere-styling，呢件衫畀《i-D》雜誌fashioneditor得到的話，一定當寶。」同屋主卻另有所感：「你看，我們以前買的衫都已經變成vintage了，我們還時時嚷着去買古着，事實上，wemakethisvintage！」聽佢這麼一講，又真的有點恐怖喎，恐怖在，我陣間執完嘢，本來仲諗住去買衫㖭。
一個星期後，被《噴射》雜誌訪問，由「今季流行」講到「35歲之前定必要做的幾件事」，──例如找到個此生無悔的興趣，前者我的答案是「金色」，後者由相熟記者B替我搶答「你呀梗係時裝啦唔使問，1500歲你都知係佢啦」，忽然將兩條線扣起，又生感觸。前幾天落Joyce買CommedesGarcons的金衫金褲，忽然醒起，以我的買衫年資來說，已經長到耐到足以讓金色在我所經歷的周期中第三次回來，而我竟然未厭，一個電話來還是即刻撲落大道中進貢，慌死買遲咗買少咗，對一些我們經歷過不是第一次的事情仍有如此passion，像主動翻看第18次周星馳梅艷芳的《審死官》，今次恐怕打風都打唔甩了，是愛了。
今次慶幸的不是永恒的初戀，是永遠的未甩拖。
到了這刻我終於肯官式地承認，原來我真係幾鍾意衫的。
人生來到這個點，難得還有樣願意沉迷不願醒的嗜好，促成了我對自己現在過的生活「知足的部份」。
見過太多人得了「奧斯卡」，又問自己為甚麼拿不到「格林美」，「格林美」都攞埋，又唔開心自己竟然沒有被提名「諾貝爾」……我近年的快樂recipe是：「唔係樣樣嘢都要你有份嘅！」
維持現在「高不成低不就」的生活，但季季可以買到一批喜愛的新衫，這種生活有得我過到80歲都願囉。
新正頭，總要來個拜年吧，將心比己，祝大家知足常樂，衣食無憂（排名梗係分先後啦！）
黃偉文自我簡介
填詞人，其實最鍾意買嘢，最憎寫字，星期日盡可能唔寫字，去買嘢。
Textby黃偉文
