人人都話今年經濟好轉，肯使多啲錢食團年飯，食鮑參翅肚當然最好啦！自問無能力豪花幾千蚊食餐飯，好彩仲有一啲平靚正嘅選擇，講老實話平貴都係食雞食魚，最緊要一家人開開心心圍埋一齊食餐飯！一班新城嘅DJ就提早團年，看看他們的心水選擇！
記者：區佩嫦
攝影：陳偉強、
周旭文、陳陶鈞
一葉家
改良台菜 健康好意頭
以健康為賣點的一葉家，將味濃兼肥膩的台灣菜大大改良，最啱日日嚷着減肥的女士。話晒都係中國人，台式賀年食品同樣以意頭行先，如元寶的雲吞、象徵團圓的金糰等更是當地人必吃的過年食品，加上多菜少油的烹調方法，這餐團年飯特別健康！
梅子鳳梨醬烤骨
為了貫徹健康的宗旨，師傅特意選用豬肋骨，並切去那層厚厚的脂肪，配合自家調製的梅子汁煮製成，甜酸味配合得宜，沒有一般甜酸醬的虛假的酸甜味，初入口還能嚐到梅香味，肉腍香軟，賣相一流。
宋家鮮肉餛飩
外形如元寶，寓意金銀滿屋，是台灣人必吃的賀年食品！它改良自蔣家私房菜，以時令蔬菜和鮮肉製成，配上清雞湯，香甜可口，難怪日賣最少500粒。
金糰$18
金糰是台灣人新年常吃的糕品，寓意團團圓圓。其外層鋪滿混入糖霜的黃豆粉，餡料是低糖麻茸，煙韌不黏牙，香甜不膩。
餐單：$198
3人餐
小食（自選一款）
胡麻肉崧蝦子豆腐/滷水雞翼/五味汁中卷/醋醃小黃瓜/麻醬粉皮/小竹笋拌三絲
點心（自選一款）
蒜香炸蘿蔔糕/台南肉燥春卷/珍菇伴腐竹/紅油抄手/宋家鮮肉餛飩/酥炸花枝丸
廚師推介（自選一款）
鳳梨梅子醬烤骨/紅燒鹿港䱽魚/麻香惹味雞/葱油雞
主菜（自選兩款）
鳳梨蓮霧牛柳粒/香葉茄子三杯雞煲/紅燒豆腐煲/鐵板回鍋豬面青/鹽酥魷魚扣/花彫蜂蜜豬小排/花菇蝦子扒津白/豆醬腐乳時蔬煲
快必：我係邊爐怪魔，團年飯最好打邊爐，鍾意食乜就淥乜！其實我最鍾意去女朋友屋企團年，因為伯母一定會煮我最鍾意食嘅土魷蒸肉餅，正！
一葉家（28568648）
地址：鰂魚涌康山道1號康怡廣場北座2樓S37-38號舖
營業時間：星期一至六11:00am-10:30pm；星期日及公眾假期9:00am-10:30pm
（年三十晚11:00am-10:30pm；初一及初二12:00nn-10:30pm；初三11:00am至10:30pm）
座位：80個
粗菜館
粗菜精做 哈蝦大笑迎豬年
開業超過12年的粗菜館，可說是「粗菜精做」的先鋒，店內採用一些被人視為下價的材料如豬內臟等，炮製出令人難以忘懷的廣東小菜。其招牌菜炒豬雜更是豬年不可不食的賀年菜式之一，還有那道茄汁蝦碌，極有住家Feel。
豬八戒招親
這是招牌菜「炒豬雜」，日賣超過100碟。豬雜包括豬膶、豬心、豬肚、生腸及粉腸，由於各部位質感不同，須分開處理，否則豬膶過硬時豬肚則未熟。師傅還用上大量薑葱酒，一上枱已散發香濃的薑葱味，而豬膶入口軟滑，豬肚、生腸腍中帶爽，最抵讚是碟底不見血水，證實火候控制恰到好處。
哈蝦大笑
蝦是團年飯中常見的主角之一，這道菜選用游水中蝦，烹調前要先去蝦腸。師傅先將中蝦走油，然後放葱蒜青紅椒炒香，最後加入自製的酸辣醬，鮮甜又惹味。
富貴黃金甲
南瓜又叫黃金瓜，一聽黃金二字已知道是賀年佳品。將切片的南瓜蘸上脆漿炸香後，用鹹蛋黃將瓜略炒，瓜面布滿了金黃的鹹蛋，非常甘香惹味。
餐單：$988
6至8人餐
海皇賀新歲
豬八戒招親
富貴黃金甲
哈蝦大笑
沙薑鳳凰
家肥屋潤
古法蒸笋殼
炒時菜
金牌老火湯
愛菩：以前團年飯由嫲嫲一手包辦，佢一次過煮三圍餸，好勁！𠵱家嫲嫲入咗老人院，我哋都冇咁大棚人一齊團年喇！不過一定要有湯圓，團團圓圓，好意頭呀！
粗菜館（23837170）
地址：九龍城衙前圍道17-19號A地下
營業時間：11:00am-12:00mn（初一及初二5:00pm-12:00mn）
座位：80個
東海漁村
平實順德菜 食得獎魚
河鮮是順德菜的一大特色，配合其繁複的工序、精巧的功夫，用最簡單的材料亦能做出可口的菜式。由澳門進駐香港的東海漁村，是正宗順德菜館，大廚太陽哥曾於國內美食大賽中贏得不少獎項，曾志偉、阿叻等老饕更是太陽哥的熟客仔！
中國金牌煎焗鮮魚嘴
呢味煎焗鮮魚嘴是鎮店之寶，師傅憑此菜於2002年贏得「北京美食節飲食大獎」、「順德美食節大獎」，既然咁猛料，大家又怎能不試呢？
師傅選用新鮮大魚魚頭，一碟就用咗3條魚！魚嘴先用秘製醬料醃過，煎香後再焗，皮脆肉滑，即使放涼後吃，亦沒有任何腥味，佐酒最佳！
韓國辣汁生爆蟹皇
這款以韓式辣醬炒成的辣蟹是嗜辣者必然之選。師傅選用每隻斤多的大花蟹，以薑葱、指天椒及辣醬炒成，夠晒鑊氣。
餐單：$999
6-8人餐
中國金牌煎焗鮮魚嘴
英國薯菜雞沙律
美國燒汁牛仔扒
法國忌廉海鮮湯
蘇俄香草焗四寶
德國啤酒燻醉鴿
意大利芝士焗大蝦
日本網燒吞拿魚
韓國辣汁生爆蟹皇
泰國生炒魚麵
台灣果冰露
李紫昕：團年飯我最記得婆婆煮嗰味豬肉柚皮，因為係阿婆嘅獨門秘技，阿媽學極都學唔到，仲有雞、發財好市等意頭菜，每年我都係蹺埋對手等食！
東海漁村（27188993）
地址：九龍城打鼓嶺道70-72號1至2樓
營業時間：11:00am-2:30pm；6:00pm-3:00am
座位：100座
大記
大牌檔歎發財金箔
開業一年多的大記，以大件夾抵食的農家菜及漁家菜為賣點，年夜飯當然以傳統的意頭菜為主，配上「年年旺相」、「包發包賺」等靚名，街坊點會唔捧場呢？
金銀滿屋
金銀滿屋是加了金箔的魚肚羮，貴氣十足。烹調前師傅須把魚肚浸發汆水，並以上湯熬製而成，最後加上矜貴的金箔作點綴，賣相攞足100分！湯羮鮮甜且不太稠，魚肚入口又腍又滑，不錯！
包發包賺
用上南非玉子鮑和靚花膠煨成近一小時，花膠滑溜，帶點入口即溶的感覺，玉子鮑軟腍入味。不要忘記鋪底的生菜，吸收了蠔油芡的精華，正！
餐單：
吉星拱照（清蒸海魚）
金豬賀年（金箔乳豬拼盤）
全年吉慶（紅燒伊麵）
吉祥如意（福建炒飯）
及
1）發財吉利（髮菜豬脷）
2）金銀滿屋（金箔魚肚羮）
3）包發包賺（鮑魚海參）
4）好市生財（蠔豉生菜）
5）年年旺相（蓮子百合雞）
（於1至5選擇其中3個餸$888；選擇其中4個餸$1,088）
慢必：團年飯多數係食盆菜，通常我會一次過買兩個，一個豐富嘅一個係齋菜！年三十晚就食個豐富嘅，團年吖嘛；而齋盆菜係初一食，通常兩個都食唔晒嘅，咁初二時就將兩個盆菜二合為一，或者買啲燒肉加落去！
大記（28193750）
地址：西環士美非路12號市政街市2字樓CF1-CF3及CF11檔
營業時間：11:00am-11:00pm
座位：350人
街坊團年
趙生
團年飯梗係要好意頭啦！發財好市、橫財就手唔少得，而且廣東人最緊要有雞。我比較鍾意大牌檔風味！
潘生
𠵱家團年飯都已經好簡單，無諗預幾多錢，總之一家人開心囉！我覺得最緊要有海鮮，咁樣先至有氣氛！
李生
順德人冇乜特別嘅賀年餸，我就一定會食河鮮，好似西江骨魚咁，食埋先有番啲家鄉風味。
詩慧（左）
我食齋，會揀啲清淡嘅餸菜，媽咪就一定要食雞，預一千蚊做Budget啦。
盧太（右）
𠵱家唔想屋企人咁辛苦，所以會出街食！潮州人一定要芋頭、烏頭魚，不過今年可能會打邊爐，夠方便！
