港交所董事會前日通過，將股價兩蚊以下細價股收窄買賣差價嘅建議擱置，經紀界一片歡呼，不過，股壇長毛DavidWebb就好似唔likey，噚日喺佢個網站發表文章，話今次港交所嘅決定，同5年前政府暫延取消股票交易最低佣金制如出一轍，都係因為政治因素喎。
政府牽住鼻哥走
阿Webb話，當年老董要連任，唔想有太多震盪，原本港交所決定要取消最低佣金制，但可能有人買咗嗰班身兼選委嘅中小經紀怕，經背後高人發功後，搞到港交所轉軚，話延後一年至取消。佢話今次擱置縮窄細價股差價，同煲呔曾要連任應該有好大關係──都係怕咗班經紀話要上街，拖低佢嘅民望囉。
所以阿Webb話，呢個根本係兩個層次嘅民主問題，一來港交所董事會有一半董事由政府委任，間接被政府牽住鼻哥走，所以應取消委任制，董事應由股東直接選出；另一個層次嘅問題就係香港冇普選，特首由小圈子選出，所以先至出現要向經紀界讓步嘅情況，因此要快啲全面普選特首。
夏佳理否認讓步
噚日港交所主席夏佳理喺維園年宵攤位現身，問佢點睇阿Webb篇嘢，佢就否認今次嘅決定係有政治壓力，亦唔係讓步，佢話其實兩蚊以下股份冇必要收窄差價，因為收窄幅度可能太細，而且差價太窄對成交亦有影響，都係為咗港交所股東利益啫。
[email protected]