上期推介曼聯亞洲盤（讓查爾頓兩球）走盤，好彩雷丁生性贏阿士東維拉，仲要贏夠兩球開出提供嘅4.1倍「主勝」，今次推介蘇超「紅盤王」鴨巴甸，迎戰些路廸希望可開「+1」嘅「主勝」。
些路廸話就話𠵱家排喺榜首，但原來今季亞洲盤差到喺蘇超排尾2，贏盤率得嗰37%；好似作客馬瑟韋爾同恩華尼斯等下游隊都贏唔到，周六要作客力爭歐聯資格嘅鴨巴甸，呢個上盤真係覺得牙煙。
睇番些路廸已經領先第2位嘅「格流」19分，下周二歐聯16強又要迎戰AC米蘭，你哋試估吓蘇羅斯基、中村俊輔同加維臣等主力會唔會被領隊收起吖嗱？唔留力就勢係假嘅！
嗰邊鴨巴甸今季一啲都唔嘢少，𠵱家守住第3少「格流」4分啫，仲有打少1場優勢；呢幾年成日都係得些路廸同「格流」壟斷個歐聯資格，今季鴨巴甸見到「格流」跌晒watt，仲唔嗱嗱臨把握機會爭前兩名？鴨巴甸貴為當今蘇超「紅盤王」（贏盤率69.2%），買親佢哋亞洲盤都有近7成收錢，呢個下盤或1.9倍「主勝」認真穩陣。文︰畢傑