幾千蚊可以做咩生意？最常聽到嘅答案，莫過於係做小販，賣吓小食。有創意嘅話，可以喺eBay賣吓嘢，本小利大，可能會有意想不到嘅收穫。不過，《香港討論區》唔少網友認為，喺香港地做小販都幾難，一係就競爭大，生意難做，再唔係就驚俾小販管理隊捉；喺網上賣嘢，又擔心未必搵到足夠客源。得幾千蚊，唔通真係要「工」字唔出得頭，打死一世工？
於是有網友建議用幾千蚊嚟買股票，趁大市調整趁低吸納優質股，賺咗錢咪可以大搞生意囉。
網友poon話：「幾千蚊都夠錢整架車仔做小販，賣吓咖喱魚蛋嘅。」不過立即引嚟網友抨擊，lilily稱：「喺香港做生意唔易㗎，淨係份租就夠你做到出晒血，小販隊又捉得勁，好似當你係通緝犯咁追。如果香港好似台北市咁，假日會開放啲地方畀小販擺賣，生意應該會易做啲。」
低吸工行儲彈藥
其他網友就話得嗰幾千蚊，想開舖頭搞生意，分分鐘連買貨嘅錢都唔夠，倒不如先攞啲錢嚟投資，買吓股，儲多啲彈藥至搞生意。ArsenalF笑言：「做咩生意吖，用啲錢嚟買工行（1398），等佢升多啲，儲到幾萬蚊先諗搞生意啦。」
網友百發百好同意咁話：「炒股都係一門生意，當中會牽涉買賣交易，而且眼光準嘅話，賺多咗錢，到時咪有錢開舖頭囉。」HDSI好快咁回應：「趁低吸納中資金融股啦，等幾個月之後，回報都應該唔錯㗎，錢多咗搞生意都易啲啦。」