鄰家有女初長成。偉易達主席黃子欣個細女黃廸怡（Wendy）今年21歲，舊年喺美國讀完大學返嚟，隨即加入黃子欣私人有份投資嘅長途廉價航空──甘泉航空，喺Marketing部門做市務代表。
又一富豪第二代出場
Wendy樣子標致，最近更加粉墨登場，拍咗個廣告，宣傳「12歲以下小朋友免費飛倫敦」及「大學生憑學生證半價買經濟艙機票」，優惠要喺本月28日前預訂。佢喺廣告扮演空姐，一張大頭相，足見青春無敵。商界從此又多一位富豪第二代靚女。
要數富豪第二代靚女，華華即刻諗起富豪酒店主席羅旭瑞位千金羅寶文，佢經常悉心打扮，為公為私出席公開場合，曝光率都幾高，最近入埋富豪酒店等3間上市公司嘅董事局。另一位係九倉主席吳光正嘅掌上明珠吳宗恩，家陣幫爸爸打理連卡佛生意。
[email protected]