幸福唔係必然，炒新股都一樣，唔一定賺錢。其實，新股同正股一樣有升有跌，高追未必次次有得執，好似上個禮拜四掛牌嘅味精股阜豐（546），第一日係威係勢升咗37%，但第二日就係咁跌，噚日升番小小上2.84元！
威一日就係咁跌
雖然同招股價2.23元有一段距離，但若果投資者抱住新股必升嘅態度高追，難免淪為味精蟹。mikemike27喺《香港討論區》話：「我喺3蚊買咗2萬股。」嘩！用成6萬銀買一隻tradingrecord唔夠一個月嘅新股，希望佢唔係瞓身啦！edmundchau就好啲，「我喺3蚊買咗啲，喺佢跌落2.88蚊再買啲，但結果都係坐艇。」
擺明隔岸觀火嘅nightfiber就話：「儍仔，何必呢？阜豐擺明炒上市，盤數同生意都爛到不得了，何必入貨？反彈好放喇！」跟手再踩多腳，「應該會跌破招股價，跟住反彈少少，之後交投會好淡，慢慢再沉淪落去。」
雖然畀人狂踩，但艇民意志非常堅定，rkc778誓言：「決定揸死1年唔放，唔信佢會跌到落谷底！」積奇蓮小蜜蜂就話：「我喺3蚊買都未走，信佢會升番！」h0041970信心仲大，「唔使驚喎，中交建（1800）都穿過6蚊啦！個個夠話佢唔得，家吓佢做幾多？（噚日收報9.66元）」
由於呢隻股上市無耐，暫無大行跟進，不如睇吓佢保薦人金榜嘅往績──話事人係有超過20年企業融資經驗嘅高寶明；令好多投資者記憶猶新嘅，係佢哋05年幫手上市嘅佳邦環球（471），招股價1.02元，家陣剩番五毫三。
保薦人往績飄忽
不過，現實永遠都唔會一面倒，金榜舊年3月幫過金鷹商貿（3308）上市，嗰陣用上限定價不特止，用噚日收市價6.52元計，唔夠1年經已較招股價3.15元升咗一個開有多，即係若果1年前你用50萬銀買金鷹，家陣已經係百萬富翁。咁阜豐到底會係高飛嘅金鷹，抑或潛水嘅佳邦呢？你自己估啦！