憑主持無綫節目《最緊要正字》火速上位的27歲「叛逆作家」王貽興，除了喜歡與文字發生關係外，對於與靚女維繫親密關係也甚有研究。近日他與靚女拍檔徐淑敏朝夕相對，美女遇才子一撻即着，雖然徐淑敏已有中坑男友黃重生，但大前晚情人節前夕她卻與王貽興甜蜜逛維園花市，在桃花前卿卿我我，實行劈腿（即一腳踏兩船）去也。
新潮文學家王貽興和21歲的落選港姐徐淑敏，自合作主持無綫節目《最緊要正字》後均人氣急升，前者是冷面才子，有型又懂得打扮，連無綫高層樂易玲也想力捧他，難怪王sir出道短短日子已女fans成籮；至於擁33C大咪咪的徐淑敏雖然已有50歲的工程師男友黃重生，但電力驚人的她卻先後與監製錢國偉和鄭嘉穎傳緋聞，近月她與王貽興拍檔做主持，新鮮感十足之餘，二人話咁快已經玩埋，展開單獨約會。
並肩而行
頻頻對望咬耳仔
上月有報道指黃重生為綁實女友，專程帶徐淑敏到西貢睇樓，希望早日同居，屢傳被中坑男友迫婚的她大前晚難得鬆綁，大條道理藉出席無綫飯局為由，與王貽興黐足一晚，二人食飯行花市直落，甜甜蜜蜜度過情人節前夕。
大前晚無綫與旗下包薪藝員在將軍澳中心吃團年飯，當晚王貽興和徐淑敏同坐一枱，雞啄唔斷，至近11時結伴離開後，即坐的士往維園年宵市場。由於花市內人頭湧湧，王貽興和徐淑敏並肩而行黐到實，態度十分親暱，沿途他們更被大批市民認出，有人大叫：「最緊要正字！」但二人完全懶理周遭聲音，只掛住對望及咬耳仔。
其間王貽興和徐淑敏走到專賣年花的攤檔，站在花前指指點點，邊揀邊笑，沒多久已選購了桃花、菊花、銀柳和毋忘我等，二人品味相同，所選的年花一模一樣，王貽興這位冷面阿sir把口更恍如「啷」過油，冧得徐淑敏掩嘴甜笑。
徐淑敏和王貽興其後各自捧着花束步往皇室堡，此時女方手機響起，王貽興即主動為她捧花，徐淑敏掛斷電話後，即取回花束兼向王貽興道別，匆匆乘的士離開。慘被丟低的王貽興只好電召的士，獨自站在柏寧酒店門前等足10分鐘才離開。
齊買桃花
「冇女友，點呷醋」
對於夜會徐淑敏齊逛花市，昨日記者問王貽興會否擔心女友詐型時，他在電話中說：「我冇女朋友，點呷醋？」再問他有否想過黃重生會呷醋時，他說：「買桃花咋喎，唔係呀？我哋嗰日約埋一齊買，希望大家第日人緣好啲。」提到當晚二人態度親暱，他則答非所問地說：「買桃花又話親熱，當日大大方方行花市㗎，有同好多檔主老闆娘影合照。」不過王貽興言談間卻流露出對徐淑敏有好感，他說：「我覺得佢為人都幾好，幾勤力。」但否認有追求之意。本報昨日也曾致電徐淑敏，但至截稿前仍未獲回覆。
採訪、攝影：娛樂突發組
