大聲W口才便給，有佢講冇人講，教會好識用人，三月之後，大聲W會到加州一帶宣揚基督，佈道傳教，以佢嘅聲名與口才，相信當地教徒會聽到入神。
香港學專家H則十幾年來孜孜不倦，宣揚香港學，佢啲大塊文章，因為講層次，每一層又有五六種變化，於是一般讀者睇到一嚿雲，大公關D講得坦白：「我每次睇一半就投降！」不過有人會睇得完嘅，聽講現在負責奧運馬術賽嘅林煥光，每晚一定要睇完專家H嘅文章先至上床。
大公關D哥襄助飛機陳處理企業傳訊事務，雖然係新上任，但勝在家學淵源，好快就打通關節，行事順利。大聲W話：「我當年在《香港時報》做採訪主任，D哥先父才子今聖嘆負責寫社論，下筆如飛。不過係人都知噃，才子今真係識嘆，風流倜儻㗎！」時代變咗咯，今人難學先人作風，否則會離婚幾十回。D哥在台北看書展，睇到大批有關男仔追女仔嘅HowTo書籍，覺得本本望之無甚高論，問書展攤位售貨員：「有冇一啲關於教女仔追男仔嘅書呀？」售貨員話有十本，D哥買咗八本回來，預備分贈友好。
左丁山素來驚呢樣，驚嗰樣，提醒D哥一句：「因住好心做壞事，無端端俾人話性騷擾，送本書畀女士，而本書教佢如何追男人，因住一啲小心小眼嘅人反咬一啖！」乜唔係呀，廣管局咁無知，要刪除《秋天的童話》幾句對白，正反映𠵱家社會上有啲心胸窄之假道德派伺機矯枉過正也。
D哥話：「唔會啩？我見到社會上有唔少女士唔拍拖，唔結婚，感情失調，想幫吓佢哋打破心理障礙啫，台灣出版咗十本不同角度嘅書，教女仔追男仔，正反映台灣有如此情況，我住過台灣、日本，知道日本女士失婚情況嚴重，日本女仔對住啲電車男，不知如何是好，香港現在亦有同樣情形吖！」D哥觀察敏銳，睇得冇錯，不過男士都係小心啲好，現在有咗平機條例，性騷擾規條，偶一不慎，就會中招。
第二日（二月十二），見《大公報》頭版頭條新聞，大字標題：「女多男少，婚姻介紹所興旺，女士洗底尋伴侶」，為之嚇咗一跳。D哥從台灣買番嚟啲「女仔追男仔術」書，咪應該好有市場？