「國家要開放，𠵱家連睇牙都要開放！」經常滿口話開放嘅朱咪咪，對於揀車就絕對唔開放；一架車對足10年，從來無諗過要換新歡，相反一直對佢寵愛有加，「我經常同佢BodyCheck，每個禮拜例必車埋囝囝、老公共享天倫之樂……我份人好實際，揀車都係一樣，唔會齋睇外表，最緊要睇內涵，就好似我一樣！」
文：許一楓
攝影：陳偉強
近排太多政治Show，個個四萬咁口懶親民話打好呢份工，不過對於多嘴嘅朱咪咪，招牌都係燦爛嘅笑容，不過感覺真誠、靠得住好多！適逢嚟緊係金豬年，就搵呢位朱小姐嚟做今期《同車蜜語》，同大家開開心心拜個早年。
咪咪姐架車一到，嘩！乜成車都係豬？豬公仔、貼紙、咕𠱸一車都係，好似為今次新年版《同車蜜語》有備而戰：「我最愛係麥嘜、麥兜；一直以嚟日本、美國漫畫喺香港可以話完全玩晒！近年本地唯一成功創作，可以話只有麥嘜，身為香港人當然要撐啦！」
一啲都唔似10年車
望住咪咪姐架HondaStepwgn，硬線條、8人車，一睇都知唔係新款，不過令人疑惑嘅係車櫳、車身，真係新到一條花痕都無，誰知咪咪姐衝口而出：「10年啦！呢架車陪我同啲囝囝度過唔少光景！」10幾年前，小朋友剛剛識行時，咪咪姐經常揸車帶佢哋去踩單車，由於睇中Stepwgn車尾箱夠大，當年不惜以25萬天價買咗呢架車。
10年車點解仲可以咁新淨？「呢架原裝車喺大昌行買嘅，佢哋嘅服務真係好，我有任何需要，都會即時幫我維修同檢查，加上我保養得好好，所以Keep得咁新淨。」咪咪姐有無諗過再買新車？「𠵱家只得我一個人喺香港，老公同啲囝囝都過晒新加坡，換車嚟都無用啦！如果再要用多幾10萬買架新車，又未必可以裝到咁多人。」原來咪咪姐閒時最鍾意揸車載朋友、親戚四處去，8人車先可以叫做符合佢嘅Target。
邊拜年邊辦年貨
成個街市笑住拜年
搵咪咪姐同香港市民拜個早年，佢就揀同佢住咗幾十年嘅九龍城街市探街坊；Set晒一身中式新年金裝嘅朱咪咪，一入街市，四周靚師奶、菜肉魚檔老闆，一眼將佢認出！
影合照、打招呼，由入街市一刻起從未間斷過，笑聲、笑臉就好似賀年醒獅一樣，行到邊、舞到邊，街市內邊檔海味正、蔬菜鮮，檔檔亦吹得兩嘴，揀街市拜早年原來亦切合佢嘅實用原則──辦年貨，「咁愛呢部Stepwgn另一個原因，當然係我咁鍾意買嘢，而且又裝得特別多貨。」
行完一輪街市，我哋就驅車到一個開揚停車場進行拍攝，點知咪咪姐突然大叫：「弊！唔記得拎多幾隻豬仔俾你哋影！」為免要佢行兩轉，我同攝記都同聲話唔使，誰知專業嘅咪咪姐一句No，原本入咗停車場八達通計錢，佢都一於少理，照返屋企攞公仔，雖然兩個地方唔遠，但呢啲咪係一絲不苟嘅專業精神囉！
俾的士佬撞完再屈
回想揸呢架車嘅10年經歷中，最令咪咪姐難忘嘅係令佢認清好人同壞人嘅分別，「幾年前，一次喺沙田大涌橋路行駛，前面轉黃燈，於是我準備停車，點知後面架的士停唔切撞埋我度，嗰個的士司機居然喺差人面前屈我，話自己當時行緊30km，仲話我喺燈位前左搖右擺，剷咗隔籬條線1呎，引致佢撞埋我度。」雖然法庭最後都判咗咪咪姐無罪，但事隔數年，面前嘅咪咪姐仍然激動。
遇着壞人、惡人只能怪自己倒霉，不過咪咪姐最近終於遇着好司機：「上星期剛剛喺大陸做完嘢，原本計劃揸車經葵涌道去荃灣石圍角邨做Show，點知臨時改變行程，要由落馬洲去，嗰刻完全唔知點去石圍角邨，好彩最後截到個的士司機，佢車我去到石圍角邨之後仲竟然唔收我錢，我好想借呢個機會，多謝呢位好心司機！」
HondaStepwgn 曾掀8人車熱潮
在97年推出時曾在港掀起一股8人車熱潮，同級對手包括ToyotaTownace、NissanSerena及MazdaFriendee。雖然第一代推出時，不少人也對其那個方匣子造型投反對票，但卻憑着闊落多變的車廂，贏回其他車迷的口碑，繼而創下甫推出便售出超過160部紀錄，真厲害。
HondaStepwgn規格
馬力：135ps/5,500rpm
扭力：18.8kgm/4,200rpm
傳動：4前速自動波
當年新車價：$228,800起
現時二手價：約$40,000起
